АҚШ вице-президентига боғлиқ мэм сабаб норвегиялик турист мамлакатга киритилмади

Аэропортда чегарачилар Норвегиядан келган 21 ёшли йигитнинг телефонини тортиб олган. Улар йигит агар телефон паролини айтмаса, жаримага тортиш ёки 5 йилга қамаш билан таҳдид қилган.

Фото: AP

21 ёшли норвегиялик турист Мадс Миккелсен телефонидан АҚШ вице-президенти Жей Ди Вэнсга алоқадор мэм топилганидан кейин иммиграция хизмати уни ҳақорат қилиб, Қўшма Штатларга киришига рухсат бермаганини маълум қилди. Суратда Вэнс кал ва мултфилм қаҳрамонларига ўхшаш юзда тасвирланган.

Йигит Ню-Жерсидаги Нюарк Либерти халқаро аэропортида 11 июн куни учиб келган. Чегарачилар уни алоҳида хонага олиб ўтиб, телефонини олиб қўйган. Меккелсеннинг айтишича, уни ҳеч қандай асоссиз гиёҳванд моддалар ташиш, террорчилик режалари ва экстремизмга оид саволлар билан сўроқ қилишган. Бундан ташқари, ундан АҚШда учрашмоқчи бўлган ҳар бир инсони тўғрисида маълумот бериш сўралган. Шунингдек, норвегияликка агар телефони паролини айтмаса, жаримага тортиш ёки 5 йилга қамаш билан таҳдид қилинган.

Меккелсен АҚШга дўстлари билан учрашиш учун ташриф буюрган, бир неча ҳафтадан кейин сафарга унинг онаси ҳам қўшилиши керак бўлган — улар бир нечта миллий боғга боришни режалаштирган.

Йигит тинтув қилинган, бармоқ излари ва қон намуналари олинган, шунингдек, унинг ташқи кўриниши сканердан ўтказилган. Бир неча соат камерада ўтирган норвегиялик Ослога қайтадиган самолёт бортига чиқариб юборилган.

Шов-шувга сабаб бўлган мазкур ҳолатдан кейин АҚШ Божхона ва чегара хизмати ўз муносабатини билдиришга мажбур бўлди. Идоранинг маълум қилишича, йигитнинг депортациясига мэм эмас, балки Миккелсен олдинлари гиёҳванд моддалар истеъмол қилганини тан олгани сабаб бўлган.

#АҚШ #депортация