Жамият | 12:25 / 11.06.2025
3345
1 дақиқада ўқилади

Одам савдоси билан шуғулланган аёл Истанбулдан Тошкентга экстрадиция қилинди

Ўзбекистон ва Туркия Интерпол ходимларининг ҳамкорликдаги ҳаракатлари натижасида одам савдоси билан шуғулланганлик учун қидирувда бўлган жиноятчи аёл ушланди ва экстрадиция қилинди.

Фото: ИИВ

Ўзбекистон Интерпол миллий марказий бюроси ходимлари кузатувида, Интерпол каналлари орқали ҳуқуқни муҳофаза қилувчи органлар томонидан одам савдоси учун қидирилаётган ва узоқ вақт давомида Туркия ҳудудида яшириниб юрган Ўзбекистон фуқароси бўлган аёл Истанбулдан Тошкентга экстрадиция қилинди.

Жиноятчи аёл сотиш ва эксплуатация мақсадида қизларга юқори маош ваъда бериб, уларни Туркияга олиб борган. У ерда қизларнинг паспортларини тортиб олиб, уларни фоҳишалик билан шуғулланишга мажбурлаган.

Интерполнинг Тошкент ва Анқара миллий марказий бюролари ўртасида олиб борилган ҳамкорликдаги саъй-ҳаракатлар ва тезкор-ахборот кузатуви натижасида жиноятчининг қаердалиги аниқланди ва у қамоққа олинди.

Ўзбекистон Бош прокуратурасининг илтимосномаси Туркия ваколатли органлари томонидан қаноатлантирилганидан сўнг, қидирувдаги шахс топилди ва Интерпол Миллий марказий бюроси ходимлари кузатувида кейинги тергов ҳаракатларини ўтказиш учун Ўзбекистонга олиб келинди.

Мавзуга оид