Италиялик эркак бир йил давомида иш жойидан салкам 2 кило олтин ўғирлади

Италия полицияси олтин эритиш корхонаси ходимини қўлга олди. La Repubblica газетасининг ёзишича, у иш жойидан қимматбаҳо металлни ўғирлаш схемасини йўлга қўйган.

Қайд этилишича, жиноятчи олтин хариди бўйича оддий ҳужжат текшируви чоғида фош бўлган. Чалкаш жавобларни қайтарган 38 ёшли эркак полицияга қиймати 23 минг еврога тенг 250 грамм олтин қуймаларини топширган.

Унинг уйида тинтув ўтказилганда яна олтин топилган, шундан сўнг эркак бир неча бор ўғирлик содир этганини тан олган. Аниқланишича, у олтинларни ўзининг узун сочларига яширган ҳолда олиб чиқиб юрган.

Эркакнинг айтишича, январ ойигача у Швейцариядаги заргарлик заводида ишлаган ва қўриқчиларнинг металл аниқловчи ускуналарини четлаб ўтиб, заводдан бир неча марта олтин олиб чиққан. Бунга ускунанинг текширув зонаси унинг сочларига қадар етиб бормагани сабаб бўлган. Умумий ҳисобда, у бир йил давомида уйига 150 минг евролик салкам 2 килограмм олтин олиб келган.