Россия Запорожие йўналишида ҳужум бошлади – Сирский 

Россия Запорожие йўналишида фаол ҳужум бошлади. Бу ҳақда Украина Қуролли кучларининг май ойидаги фаолияти якунларига бағишланган йиғилишда бош қўмондон Александр Сирский маълум қилди.

«Мудофаа кучлари душманни катта йўқотишларга олиб келган ҳолда ушлаб туришда давом этмоқда. Душман асосий кучларини Покровский, Торецкий, Лиманский, Новопавловский йўналишларига, шунингдек, Суми вилоятининг Россия билан чегарадош ҳудудларига қаратди. Запорожие йўналиши бўйича ҳужумларни сезиларли даражада кучайтирди», деди у.

Бош қўмондон Украина Қуролли Кучлари фронт ортида душман ва унинг мудофаа салоҳиятини йўқ қилаётганини ҳам айтди. Май ойида DeepStrike воситалари Россия ҳудудидаги 58 та нишонга, ҳарбий объектларга зарба берди, тажовузкорнинг ҳарбий-саноат комплекси имкониятларига путур етказди. Мақсадлар орасида портловчи моддалар ва дрон ишлаб чиқариш объектлари бўлган.

Сирскийнинг алоҳида қўшимча қилишича, Курск йўналишидаги операция давом этмоқда.

2025 йилда Россия ўз кучларини Украинанинг шарқи ва шимолида жамлаб, фронтдаги эскалацияни кучайтирмоқда. Кремлнинг ёзги ҳужуми Украина кучларини толиқтириб, мудофаани ёриб ўтиш ва Киев билан Ғарб ҳамкорларига стратегик босим ўтказишни мақсад қилган.

Аввалроқ, Украина президенти Владимир Зеленский Россиянинг ёзги ҳужуми мақсадларини ошкор қилди. Унинг таъкидлашича, руслар Суми йўналишида куч тўпламоқда ва Украина шарқи ва жанубидаги ҳужум ҳаракатларига оид мақсадларини ўзгартирмаяпти.