Кая Каллас: Сербия геосиёсий танлов қилиши керак

«Сербиянинг Европа келажаги у қўллаб-қувватлайдиган қадриятларга боғлиқ», деди Белградда Европа Иттифоқининг бош дипломати Сербия президенти Александр Вучич 9 май куни Москвадаги парадда қатнашганидан сўнг.

Фото: European Union

Европа Иттифоқининг ташқи ишлар ва хавфсизлик сиёсати бўйича олий вакили Кая Каллас Белградга ташрифи чоғида Сербия «қаерда бўлишни хоҳлаши» бўйича «стратегик, геостратегик» танлов олдида турганини айтди. 22 май, пайшанба куни Associated Press агентлиги Европа Иттифоқи бош дипломатининг сўзларидан иқтибос келтирди.

Сербия президенти Александр Вучич Брюсселнинг огоҳлантиришларини эътиборсиз қолдириб, 9 май Ғалаба куни Москвада ўтказилган ҳарбий парадда қатнашганидан икки ҳафта ўтгач, Каллас: «Сербиянинг Европа келажаги у қўллаб-қувватлайдиган қадриятларга боғлиқ», деди.

Европа Иттифоқи бош дипломати Вучичга бу борадаги фикрларини билдирди. «Украинада бу даҳшатли уруш олиб бораётган одам билан нега ёнма-ён туришимиз кераклигини тушунмаяпман», деди Каллас. Унинг қўшимча қилишича, Сербия президенти «ўз версиясини тақдим этган».

Калласнинг сўзларига кўра, Сербия сиёсий раҳбарияти ЕИга киришни ўзининг стратегик мақсади деб аташда давом этмоқда. Бироқ, Брюссел «бу сўзларни исботлайдиган ва қўллаб-қувватлайдиган ҳаракатларни кўришни» истайди, деди у: «Ислоҳотлар — бу Сербиянинг Европа Иттифоқи йўлида қандай ҳаракат қилишидир. Аъзоликка ҳеч қандай қисқа йўл йўқ. Бу ерда Белградда ҳақиқий тараққиётга эришиш керак».

#Сербия #Европа Иттифоқи #Кая Каллас