Курсклик амалдор Путиндан Суми областини босиб олишни сўради

Россиянинг Курск области Глушково райони раҳбари Павел Золотарев мамлакат президенти Владимир Путин билан учрашувда уни Украинанинг Суми областини босиб олишга чақирди. 21 май, чоршанба куни ТАСС давлат агентлиги хабарига кўра, бу Путин ва Курск областидаги муниципалитетлар раҳбарларининг учрашувида содир бўлди. Украина кучларини чегарадан неча километр узоқлаштириш кераклиги ҳақида гапирган Золотарев шундай деди: «Суми бизники бўлиши керак. Яриморолдагидек яшай олмаймиз. Биз кўп бўлишимиз керак. Ҳеч бўлмаганда Суми. Мен шундай деб ўйлайман».

«Шунинг учун улар Александр Евсеевични (Курск области губернатори вазифасини бажарувчи Александр Хинштейн) сайлашди, у ҳам кўпроқ нарсани хоҳлайди», деб жавоб берган Путин.

Россия чегарасидан тахминан 30 километр узоқликда жойлашган Суми шаҳри мунтазам равишда ўққа тутилмоқда. DeepState лойиҳаларидан бирининг маълумотларига кўра, Суми областида Россия ҳарбийлари томонидан босиб олинган ҳудудлар йўқ. Россия армияси уни 2022 йил март ойида, Киевга ҳужум муваффақиятсизликка учраганидан кейин тарк этганди.

Айни пайтда Украина Миллий гвардияси 20 май куни Россиянинг Суми областидаги ўқ отиш полигонига берган зарбаси натижасида олти украиналик ҳарбий хизматчи ҳалок бўлганини маълум қилди. Путин Курск областида «кўнгиллилар» билан учрашувда ушбу зарба ҳақидаги саволга жавоб берар экан, Украина қуролли кучлари «чегара» томон ҳаракатланаётганини айтди.

13 апрел куни Россия ҳарбийлари Суми шаҳри марказига ракета ҳужуми уюштирган ва 35 киши, жумладан, икки бола ҳалок бўлганди. 120 дан ортиқ киши жароҳатланган. Россия мудофаа вазирлиги зарба нишони "Северск" оператив-тактик гуруҳи қўмондонлик штаби йиғилиши ўтказиладиган жой бўлганини маълум қилганди.