Германия ТИВ: АҚШ Россияга қарши янги санкциялар киритади

АҚШ ҳукумати Россияга қарши янги санкцияларни ишлаб чиқмоқда ва президент Доналд Трампнинг сўзларига қарамай, уларни қабул қилиши мумкин. Бу ҳақда 20 май, сешанба куни ZDF телеканалида Германия ташқи ишлар вазири Йоханн Вадефул айтиб ўтди.

ZDF журналисти Трампнинг 20 май куни АҚШ Россияга қарши янги санкциялар киритмаслиги ҳақидаги баёнотига эътибор қаратди. «Бу нотўғри таассурот. АҚШ Сенатида катта миқдордаги санкциялар тўплами, бу борадаги қонун лойиҳаси бор. Уни аллақачон Сенатдаги 80 га яқин ҳамкасблар қўллаб-қувватлаган», — деб жавоб берди Вадефул.

Унинг сўзларига кўра, 14-15 май кунлари Анталияда бўлиб ўтган НАТО ташқи ишлар вазирларининг йиғилишида у янги санкциялар тўғрисидаги қонун лойиҳаси ҳаммуаллифи, республикачи сенатор Линдси Грэм билан гаплашган. «Ҳозир оқибатлар бўлиши керак деган аниқ қатъийлик бор. Биз АҚШдаги ҳамкасбларимиз билан — маъмурият билан ҳам, конгрессменлар билан ҳам бу ҳақда гаплашмоқдамиз», — деди Вадефул. У, шунингдек, АҚШ давлат котиби Марко Рубиони ҳам санкция музокараларидаги шериклари қаторида тилга олди.

«Америка ҳам ҳаракат қилади. Бу аниқ айтилган. Ҳозир стратегик сабр-тоқат керак. Биз бу масалада очиқ туришимиз керак», деди Германия ташқи ишлар вазири. «АҚШ кенг қамровли санкциялар пакетини тайёрламоқда. Энди у Конгресс муҳокамасига тақдим этилади. Албатта, у бу муҳокамалардан ўтиб кетсагина кучга кириши мумкин. Лекин эшитишимча, бу содир бўлади. Биз бу борада ҳамкасбларимиз билан яқин алоқадамиз».