Пенсия тизими хусусий секторга берилиши рад этилди

Пенсия тизимини хусусий секторга берилиши режалаштирилаётгани ҳақида ижтимоий тармоқлардаги хабарлар асоссиз. Бу ҳақда Стратегик ислоҳотлар агентлиги хабар берди.

«Пенсия тизимига хусусий секторни жалб қилиш таклифи давлат иштирокидаги пенсия фондини бекор қилишни назарда тутмайди», дейилади хабарда.

Қайд қилинишича, ушбу масала халқаро экспертлар томонидан пенсия тизимини ислоҳ қилиш юзасидан таклиф этилган бир қатор тавсиялардан бири бўлиб, ҳозир Стратегик ислоҳотлар агентлиги ва бошқа тегишли идоралар томонидан ўрганилмоқда.

«Шу билан бирга, пенсия тизимига оид ҳар қандай ўзгаришлар халқаро тажриба таҳлили, шунингдек, аҳоли фикри ва эҳтиёжларини чуқур ўрганиш асосида шакллантириб, барча ташаббуслар жамиятнинг ижтимоий ҳимоясини кучайтиришга қаратилади», дейилади хабарда.

13 май куни Стратегик ислоҳотлар агентлигида Халқаро маслаҳатчилар кенгаши аъзолари билан учрашув бўлиб ўтди. Унда 2025 йилга мўлжалланган қўшма дастур доирасида тайёрланган ташаббуслар муҳокама қилинди. Хусусан, ХМК вакиллари пенсия тизимининг жорий моделини қайта кўриб чиқиш зарурлигини таъкидлаб, молиявий барқарорликни таъминлаш мақсадида 6 та асосий йўналишни ўз ичига олган пенсия ислоҳоти режасини ишлаб чиқди.

Улар: пенсия жамғармасига бадаллар тўланган давр асосида «суғурта стажи» тизимини жорий этиш, пенсия хизматларини кўрсатишнинг барча босқичларини рақамлаштириш, ихтиёрийлик ва жамғариб бориш тамойилларига асосланган хусусий пенсия жамғармаларини ташкил этиш. Кенгаш бу йўналишда 5 та қонунни қабул қилишни таклиф этди.