Келлог: АҚШ Украинада Европа кучларини жойлаштиришни муҳокама қилмоқда

Урушни тартибга солиш доирасида Буюк Британия, Франция, Германия ва Полша кучларини Днипро ғарбига жойлаштириш масаласи муҳокама қилинмоқда, деб хабар берди АҚШ президентининг Украина бўйича махсус вакили.

Фото: Andrew Harnik / Getty Images

Қўшма Штатлар Россия-Украина урушини потенциал тартибга солиш доирасида Днипро дарёси ғарбида Европа тинчликпарвар кучларини жойлаштириш имкониятини муҳокама қилмоқда. Бу ҳақда АҚШ президентининг Украина бўйича махсус вакили Кит Келлог 13 май, сешанба куни Fox News телеканалига берган интервьюсида маълум қилди. Унинг сўзларига кўра, миссияга Буюк Британия, Франция, Германия ва Полшадан ҳарбий хизматчилар жалб этилиши мумкин.

«Биз чидамлилик кучи (resilience force). ҳақида гапиряпмиз. Бу E3 деб аталадиган нарса, лекин инглизлар, французлар ва немислар ҳақида гап кетганда, бу аслида E4. Ва поляклар. Днипро дарёсининг ғарбий қисмидаги куч, бу унинг алоқа зонасидан чиқиб кетганлигини англатади», деди Келлог.

Унинг таъкидлашича, АҚШ биринчи навбатда «тўлиқ сулҳ» тарафдори, шундан сўнг томонлар бошқа масалаларни — алоҳида ҳудудлар мақоми, Запорижжя атом электр станцияси, украиналик болаларнинг қайтиши ва Украинанинг НАТОга аъзо бўлиш истиқболларини муҳокама қилишлари керак.

Шу куни Reuters агентлиги уч манбага таяниб, президент Доналд Трамп Кит Келлог ва яна бир махсус вакил Стив Уиткоффни Россия ва Украина ўртасида 15 май куни Истанбулда бўлиб ўтиши мумкин бўлган музокараларга жўнатмоқчи эканини хабар қилди. Улар кузатувчи сифатида қатнашади, дея аниқлик киритди CNN.

#Украина #Кит Келлог

Ғарб ва Украина Россиядан 30 кунлик оташкесим эълон қилишни талаб қилди, Путин бунга жавобан Истанбулда Россия ва Украина ўртасида тўғридан тўғри музокараларни тиклашни таклиф этди.