Россиянинг Украинадаги собиқ қўмондони Жазоирда кўриниш берди. У Пригожин исёнидан кейин «йўқолиб қолганди»

Армия генерали Сергей Суровикин Жазоирда ишлаётгани маълум бўлди. РФ элчихонаси 9 май муносабати билан эълон қилган суратларда у ҳам акс этган.

Фото: Россиянинг Жазоирдаги элчихонаси

Россиянинг Украина ҳудудидаги Бирлашган қўшинлар гуруҳининг собиқ қўмондони, армия генерали Сергей Суровикин ҳозирда Жазоирда ишлаётгани маълум бўлди. Бу ҳақда ҳарбий мавзуларни ёритиб борадиган Telegram каналлар хабар бермоқда.

Улар 9 май – Ғалаба куни муносабати билан Россиянинг Жазоирдаги элчихонаси томонидан эълон қилинган суратларга эътибор қаратган. Ушбу суратларда Суровикин ҳам акс этган.

Элчихона хабарида генералнинг исми тилга олинмаган, бироқ унинг «россиялик ҳарбий мутахассислар гуруҳи раҳбари» сифатида лавозими келтирилган.

Суровикин 2023 йил ёзда Евгений Пригожиннинг исёнидан кейин оммага кўриниш бермай қўйган. ОАВда генерал исёндан олдинроқ хабардор бўлгани, шунингдек, унинг ҳибсга олингани ҳақида миш-мишлар тарқалган эди. Ушбу маълумотлар расман тасдиқланмаган.

Суровикин 2022 йил октябрдан 2023 йил январга қадар Россиянинг Украинада Бирлашган қўшинлар гуруҳини бошқарган. Хусусан, унинг раҳбарлиги остида россиялик ҳарбийлар Херсонни ташлаб, Днепрнинг ғарбий қирғоғига чекинган.

2025 йил февралда Россия Давлат думасининг мудофаа бўйича қўмитаси аъзоси Виктор Соболев Суровикин Африка давлатларининг бирида «ҳарбий маслаҳатчи сифатида» ишлаётганини маълум қилган эди.

#Жазоир #Сергей Суровикин