АҚШ ва Хитой Женевадаги музокаралар ижобий якун топганини эълон қилди

АҚШ Хитой билан тарифлар бўйича «келишув» юзасидан бир қарорга келди. Бу ҳақда 11 май, якшанба куни Вашингтоннинг савдо музокараларидаги вакили Жеймисон Грир маълум қилди. Унга кўра, тафсилотлар 12 май куни эълон қилинади.

Хитой Халқ Республикаси Давлат кенгаши бош вазири ўринбосари Хе Лифэн бошчилигидаги Хитой томони Женевада бўлиб ўтган музокаралар якунига етганидан кейин ҳеч қандай изоҳ бермади, деб хабар берди dpa агентлиги.

АҚШ президенти Доналд Трамп аввалроқ мамлакат миллий хавфсизлигига савдо тақчиллиги таҳдиди сабабли фавқулодда ҳолат эълон қилган эди. «Биз хитойлик ҳамкорларимиз билан эришган келишувимиз ушбу миллий фавқулодда вазиятни ҳал қилиш бўйича ишимизда ёрдам беришига ишончимиз комил», деди Грир икки кунлик музокаралар якунида.

Томонлар келишмовчиликлар дастлаб ўйлагандек катта эмаслиги тўғрисида бир фикрга келди, дея хабар беради dpa ахборот агентлиги. АҚШ молия вазири Скотт Бессентнинг айтишича, бу борада «катта ўзгариш»га эришилган. Унинг позициясини Хе Лифэн қўллаб-қувватлади.