WP: Оқ уй Украинадан АҚШдан ноқонуний муҳожирларни қабул қилишни сўраган

The Washington Post нашрининг ёзишича, январь ойи охирида Трамп маъмурияти Киевни АҚШдан депортация қилинган учинчи давлат фуқароларини қабул қилишга «ундаган». Бироқ Украина бу илтимосни жиддий қабул қилмаган.

Фото: The Washington Post

Доналд Трамп маъмурияти январь ойи охирида Украинани Қўшма Штатлардан чиқариб юборилган учинчи давлат фуқароларини қабул қилишга «чақирган». The Washington Post (WP) 6 май, сешанба куни ўз қўлидаги ҳужжатлар ва Киевдаги манбаларига таяниб хабар беришича, гап қанча фуқаролар ҳақида кетаётгани аниқлаштирилмаган.

Газетанинг қайд этишича, ҳужжатлардан Киев расмийлари америкалик юқори мартабали дипломат юборган сўровга қандай жавоб бергани номаълум. Украина дипломати АҚШ элчихонасига унинг ҳукумати ўз позициясини билдирганидан кейин жавоб беришини маълум қилди, холос.

WP шунингдек, Украина АҚШдан учинчи давлат фуқароларини қабул қилмаганини ва Америка таклифини жиддий кўриб чиққанига ишора йўқлигини таъкидлайди. Бу масала ҳатто Киевдаги ҳукуматнинг энг юқори даражаларига ҳам етиб бормаган, деб ёзади газета Украина расмийларига яқин манбаларга таяниб. WP'нинг Киевдаги манбаларидан бири бу сўров бўйича Вашингтон томонидан қўйилган «сиёсий талаблар»дан хабари йўқлигини айтди.

#АҚШ #Украина #муҳожир