Зеленскийнинг Трампни оғдиришга уриниши муваффақиятсизликка учради – ОАВ

Украина президенти Владимир Зеленский юмшоқроқ ёндашиш орқали АҚШ президенти Доналд Трампни ўз тарафига оғдиришга ҳаракат қилмоқда. Бироқ, бу вазифа имконсиз бўлиши мумкин, деб ёзди The Wall Street Journal (WSJ).

Қайд этилишича, Зеленский аллақачон Трамп таклиф қилган вақтинчалик ўт очишни тўхтатишга рози бўлган, шунингдек, АҚШ билан минерал ресурслар бўйича келишувни имзолаган. Бундан ташқари, Украина раҳбари Россия президенти Владимир Путин билан учрашиш учун Туркияга борди, аммо Путин учрашувга келмади.

Ҳатто бу ёндашув Зеленскийга деярли ҳеч нарса келтирмади, деб ҳисоблайди нашр. Путин билан кечаги суҳбатдан сўнг Трамп яна Кремль раҳбари томонидан урушни тугатиш бўйича таклиф қилинган ҳаракатлар кетма-кетлигига ўтди, шунингдек, Москвага нисбатан ўз позициясини юмшатди.

Нашрнинг эслатишича, Путин 30 кунлик сулҳ битимини имзолашдан бош тортганида, Трамп аввал таҳдид қилганидек, Россияга қарши янги санкциялар киритмади. Бунинг ўрнига АҚШ президенти яна бир бор Украина ва Россия ўзаро музокара олиб бориши кераклигини айтди.

Аввалроқ, Трамп Зеленский билан Оқ уйда учрашганида, унинг Россия урушни тугатмоқчи эмаслиги ҳақидаги баёнотига кескин муносабат билдирган эди. Энди эса ўзи Путиннинг ўт очишдан бош тортишига «чидаб бермоқда».

Журналистларнинг таъкидлашича, муваффақиятсиз учрашувдан сўнг Зеленский Трампнинг талабларини бажаришга тайёр эканини айтди ва апрель ойи охирида Ватиканда АҚШ президенти билан яна бир бор учрашди. Шунда улар ярашиб олгандек туюлганди. Шунга қарамай, Америка етакчиси Путинга ҳамон ижобий муносабатда.

Нашрнинг қўшимча қилишича, Путин урушни тугатиш таклифларига очиқ эканини айтади, аммо вақтинчалик ўт очишни тўхтатиш бўйича Украина-АҚШ ташаббусини рад этишда давом этмоқда. Унинг таъкидлашича, жанговар ҳаракатлар тўхтатилишидан олдин «қатор мураккаб масалаларни ҳал қилиш керак».

Аввалроқ, АҚШ президенти Доналд Трамп Вашингтон Россия-Украина урушига аралашмаслиги кераклигини айтган эди. Путин билан суҳбатдан сўнг, Оқ уйда ўтказилган матбуот анжуманида у урушни тугатиш ҳаракатларидан воз кечиши ҳақида ўйлаётганини, бунинг учун «қизил чизиқлар» борлигини айтди.