Колумбияда 6 та маймунни божхонадан иштонларига яшириб олиб ўтишга уринган шахслар ушланди

Колумбияда олтита маймун боласини ички кийимлари орасига яширган ҳолда мамлакатдан олиб чиқишга уринган шахслар қўлга олинди, деб хабар беради Daily Star.

Қайд этилишича, 3 май куни Хосе Мария Кордова номидаги аэропорт хавфсизлик хизмати ходимлари текширув вақтида ноқонуний равишда ҳайвонларни олиб чиқмоқчи бўлган эркак ва аёлни пайқаб қолган.

Уларнинг ёнидан иккита капуцин ва йўқолиб кетиш хавфи остида бўлган тўртта тамарин топилган. Ҳайвонлар тиббий кўрикдан ўтказиш ва реабилитация қилиш учун зудлик билан Корнер марказига олиб борилган.

Колумбия расмийларининг маълумотларига кўра, маймунлар тинчлантирувчи дори воситалари таъсирида бўлган. Уларда сувсизланиш, тўйиб овқатланмаслик ва шафқатсизларча муносабатга учраганлик белгилари аниқланган. Приматлар мато қопларга ўралиб, оёқлар орасига яширилган — бу эса уларнинг аҳволини янада ёмонлаштирган.

Қайси миллатга мансублиги ошкор этилмаган жуфтлик Доминиканга учиши керак бўлган. Улар ҳайвонларга шафқатсиз муносабатда бўлиш, ёввойи турлар савдоси ва табиий ресурслардан ноқонуний фойдаланишда айбланмоқда.

«Фауна эркинликда қолиши керак. Биз бундай жиноятлар сони ошишига йўл қўймаймиз», — дейди Cornare табиатни муҳофаза қилиш ташкилоти директори Хавер Валенсия Гонсалес.