Евроиттифоқ Россиянинг 150 та танкерига қарши санкциялар жорий этади — Bloomberg

ЕИ Россияга қарши санкцияларнинг 17-пакетини тайёрламоқда. У 20 май куни Брюсселда ўтказиладиган йиғилишда қабул қилиниши мумкин.

Фото: Blomberg

Европа Иттифоқининг Россияга қарши навбатдаги санкциялар пакетидан 60 та жисмоний ва юридик шахс, шунингдек, «соядаги флот»нинг бир қисми бўлган 150 га яқин танкер ўрин олади. Бу ҳақда Bloomberg ўз манбаларига таяниб хабар берди.

ЕИ Ташқи ишлар вазирлари Брюсселда 20 май куни ўтказиладиган учрашувда янги санкциялар пакетини тасдиқлаш ниятида.

Агентликнинг қайд этишича, агар чеклов чоралари кучга кирса, санкцияларга учраган Россия нефтини ташувчи кемалар сони 300 тага етади. Еврокомиссиянинг Россия энергия ресурсларидан воз кечиш бўйича «йўл харитаси»да «соядаги флот»га қарши курашнинг янги чоралари ҳақида сўз боради.

Санкциялар пакетини қабул қилиш учун ЕИга аъзо барча давлатларнинг қўллаб-қувватлови керак бўлади. Манбаларга кўра, Европа Иттифоқининг айрим давлатлари бу каби қарорларни қабул қилишда Будапешт ветосини айланиб ўтиш имкониятини муҳокама қилмоқда.

Санкцияларнинг 16-пакети 24 февралда тасдиқланган эди. У орқали ЕИ Россиянинг яна 13 та банкига SWIFT тизимидан фойдаланишни тақиқлаган. Шунингдек, РФдан бирламчи алюминий импорти ва Россияга тегишли саккизта ОАВнинг Европадаги фаолияти тўхтатилган. Қора рўйхатдан 48 киши ва 35 та юридик шахс ўрин олган. Бунга жавобан Россия мамлакатга кириш тақиқланган ЕИ фуқаролари рўйхатини кенгайтирган эди.

#Россия #ЕИ #соядаги флот