Тирик ва соғ-саломат: АҚШда 63 йил аввал бедарак йўқолган аёл топилди

Висконсинда йўқолган аёлни йиллар давомида топишнинг имкони бўлмаган. У бу вақт ичида АҚШнинг бошқа штатида яшаб келган.

АҚШда 1962 йил июлида йўқолган аёл — Одри Бакеберг тирик ва соппа-соғ ҳолатда топилди. Бу ҳақда Висконсин штати Сок округи шерифи офиси маълум қилди.

Қайд этилишича, Одри йўқолган вақтида эндигина 20 ёшда бўлган ва у штатнинг Ридсберг шаҳарчасида яшаб келган. Аёлнинг уйдан ўз хоҳиши билан чиқиб кетгани таъкидланмоқда.

The Guardian’нинг аниқлик киритишича, Одри Бакеберг (қизлик фамилияси келтирилмаган) 15 ёшида Роналд Бакебергга турмушга чиқади. Улар икки фарзандли бўлишади, бироқ эр-хотин муносабатлари мураккаблашиб кетади. Одри йўқолишидан аввал судга мурожаат қилиб, турмуш ўртоғи уни калтаклагани ва ўлдириш билан таҳдид қилганини билдирган.

Одри ғойиб бўлган куни ўзи ишлайдиган фабрикага маошини олиш учун кетган. У билан бирга болаларининг энагаси ҳам машинада Висконсин маркази — Мадисонга боришади. Сўнгра аёл автобусга ўтириб, Индианаполисга йўл олган. Болаларнинг энагаси ўша вақтда 14 ёшда бўлган. Кейинроқ у полицияга ўша вазиятда хавотирга тушиб, ортга қайтмоқчи бўлганини бироқ Одри рози бўлмаганини айтган. Одрини кўрган сўнгги манзили — автобус бекати бўлган.

Таъкидланишича, терговчилар йиллар давомида турли фаразларни кўриб чиқиб, Одрини қидиришда давом этган, бироқ иш якунда боши берк кўчага кириб қолган.

Терговчилар 2025 йил бошида эски ишларни қайта кўриб чиқиш жараёнида йўқолган аёлнинг синглиси профилини генеалогик сайтдан топишади. Шу орқали ишда бурилиш юз беради ва Одрини ҳам топишади.

Маълум бўлишича, Одри бошқа штатда (номи очиқланмаган) яшаб келган. Ишни очган Айзек Ҳенсоннинг айтишича, аёл у ерда ҳаётини янгидан бошлаган ва бундан заррача афсусда эмас.

#АҚШ #аёл #бедарак йўқолганлар