Германияда руслар ҳақидаги бестселлерлар муаллифи Александра Фрёлих ўлдирилди

«Менинг рус қайнонам ва бошқа фалокатлар» романи ва унинг давоми - «Руслар билан саёҳат» нашр этилгандан сўнг машҳурликка эришган ёзувчи Александра Фрёлих Гамбургда ўлдириб кетилди. Германиянинг Focus Online ва Bild нашрлари 28 апрель, душанба куни полиция вакилларига таяниб, 58 ёшли аёлнинг ўлимига қаттиқ жисмдан етказилган жароҳат сабаб бўлганини ёзди.

Ҳозирча қотилликда гумон қилинган шахс аниқланмади, тергов давом этмоқда. Ўз навбатида, NDR телеканали ҳуқуқ-тартибот идоралари ходимлари эътиборига Фрёлихнинг яқин қариндоши тушганини таъкидлайди. Гамбург полицияси ҳам ёзувчи 22 апрель куни эрталаб ўғилларидан бири яшаган сузиб юрувчи уйда ўлик ҳолда топилганини тасдиқлади.

Focus Online Александра Фрёлихни сўнгги йиллардаги энг муваффақиятли немис ёзувчиларидан бири деб атайди. 2012 йилда «Менинг рус қайнонам ва бошқа фалокатлар» романи нашр этилиб, у Der Spiegel ҳафталигининг бестселлерлар рўйхатига киритилганидан сўнг, Фрёлих роман ўзининг тажрибасига асосланганлигини айтди.

Ёзувчининг уч ўғлидан иккитасининг отаси россиялик бўлиб, Фрёлих улар билан ажрашган, деб ёзган Hamburger Abendblatt газетаси 2014 йилда «Руслар билан саёҳат» романи чоп этилгандан кейин. 2016 йилда Фрёлихнинг яна бир романи «Ўлим муқаррар» ва 2019 йилда «Шкафдаги скелетлар» чоп этилди.

Ёзувчиликдан ташқари, у немис оммавий ахборот воситаларида, жумладан Der Stern, Petra ва Freundin учун мустақил муаллиф сифатида ишлаган. Фрёлих ўзининг журналистик фаолиятини Киевда бошлаган ва у ерда аёллар журналларини ривожлантирган.