Франция Россия ҳарбий разведкасини мунтазам равишда киберҳужумлар уюштириб келганликда айблади

Франция расмийлари Россия ҳарбий разведкасини мамлакатга қарши сўнгги ўн йил давомида содир этилган киберҳужумларга алоқадорликда айблади. Франция ТИВга кўра, гап Европа ва АҚШдаги ҳукумат ресурсларига ҳужумлари билан танилган APT28 (Fancy Bear) номли гуруҳ ҳақида кетмоқда.

Маълумотларга кўра, 2021 йилдан бери Россия Разведка бош бошқармасининг (ГРУ) киберҳужумлар билан шуғулланувчи бўлинмаси Франциядаги ўнга яқин, жумладан, «мудофаа, молия ва иқтисодиёт секторларга» алоқадор ташкилотларга ҳужум уюштирган. «Франция APT28 гуруҳининг Россия ҳарбий разведкаси томонидан фойдаланилишини кескин қоралайди, ушбу гуруҳ мамлакатимиз манфаатларига қарши бир неча бор киберҳужумлар уюштирган», — дейилади вазирлик баёнотида.

Мамлакат ташқи ишлар вазири Жан-Ноэл Барро ГРУ томонидан APT28 орқали Францияга нисбатан бир неча йил давомида киберҳужумлар бўлганини расман тасдиқлади — бу Франция ҳукуматининг Россия ҳарбий разведкасини илк бор расман айблашидир.

Шунингдек, ТИВдагиларнинг таъкдилашича, «Францияда президентлик сайлови авжига чиққан пайтда APT28 кенг кўламли ҳакерлик операциясида иштирок этган ва жамоатчилик фикрига таъсир ўтказишга уринган». «Ўғирланган минглаб ҳужжатлар сайловчиларни чалғитиш мақсадида тарқатилган, аммо бу уриниш сайлов натижаларига реал таъсир кўрсатмаган», — дейилади баёнотда.

ГРУ, шунингдек, французлар ҳаётининг турли жабҳаларини қамраб олган ташкилотларга — давлат идоралари, хусусий корхоналар ва ҳатто 2024 йилги Олимпия ва Паралимпия ўйинларида иштирок этган спорт ташкилотларига ҳам ҳужум қилган.

«Франция ҳамкорлари билан биргаликда Россиянинг зарарли киберфаолиятига қарши курашиш ва зарур бўлса, муносиб жавоб бериш учун барча мавжуд воситалардан фойдаланишга қатъий бел боғлаган», — дейилади ТИВ хабарида.

Fancy Bear гуруҳи глобал миқёсдаги кўплаб киберҳужумларда, жумладан, 2016 йилги АҚШ президентлик сайловларида иштирок этганликда айбланади. Ўшанда бу гуруҳ Демократик партияга оид электрон хатларни ошкор қилиб, Доналд Трампга ёрдам берганликда гумон қилинган эди. Гуруҳ кўпинча шахсий электрон почта аккаунтларига ҳужум қилиб, улардан маълумотлар ёки тизимдаги бошқа компютерлардан фойдаланиш имкониятини қо;лга киритишга ҳаракат қилади.

2017 йилда Эммануэл Макроннинг биринчи президентлик кампанияси чоғида россиялик ҳакерлар овоз бериш жараёнлари бошланишидан 24 соат олдин минглаб ҳужжатларни қўлга киритган ва эълон қилган эди. 2024 йил сентябр ойида эса бир нечта халқаро разведка хизматлари, жумладан, немис разведкаси, НАТО мамлакатларига қарши бўлиши мумкин бўлган киберхавфлар ҳақида огоҳлантирганди.