Макрон Фаластинни тан олишни «маънавий бурч» деб атади

Франция президенти Эммануэл Макрон Фаластин давлатини тан олиш «маънавий бурч» ва сиёсий зарурат эканини айтди.

Сингапурдаги матбуот анжуманида сўзлаган Макрон Фаластин давлатчилигини тан олиш қатор шартларнинг бажарилиши билан бирга бўлиши кераклигини таъкидлади.

Бу шартлар қаторида у Фаластин давлати томонидан Исроилнинг яшаш ва хавфсизлик ҳуқуқини тан олиши, ҲАМАС ҳаракатининг қуролсизланиши, ҲАМАСнинг Фаластинни бошқаришда иштирок этишдан бош тортиши ва гаровга олинганларни озод қилишни келтирди.

Франция раҳбари, шунингдек, агар Исроил яқин соатлар ва кунларда Ғазо секторидаги гуманитар вазиятга мақбул ечим таклиф қилмаса, халқаро ҳамжамият Тел-Авивга нисбатан қатъий умумий позицияни эгаллаши кераклигини таъкидлади.

Унинг таъкидлашича, бундай вазиятда ЕИ ўз тамойилларига мувофиқ ҳаракат қилиши, инсон ҳуқуқларини ҳурмат қилишга асосланган жараёнларни якунлаши ва санкциялар жорий этиш имкониятларини кўриб чиқиши керак.

«Биз қатъийроқ бўлишимиз керак, чунки бу ҳозир заруратга айланган. Лекин мен ҳали ҳам Исроилнинг позицияси ўзгаради ва гуманитар ечим топилади деб умид қиламан», — дея қўшимча қилди Макрон.