Россияда мигрантларнинг фарзандларини боғчага қабул қилишда қўшимча ҳужжатлар талаб этилиши мумкин

Россия Таълим вазирлиги чет эл фуқароси ёки фуқаролиги бўлмаган шахсларнинг фарзандларини боғчаларга қабул қилишда уларда инфекцион касалликлар йўқлиги тўғрисида маълумотнома ҳам тақдим этиш талаб қилинадиган қонун лойиҳасини ишлаб чиқди.

Бундай ҳужжатлар рўйхати ҳукумат томонидан тасдиқланади. Айни вақтда улар қаторидан сил, захм, ОИВ ва мохов касалликлари ўрин олган.

«Мазкур ўзгаришлар мактабгача таълим дастурларини амалга оширувчи боғчаларда тарбияланувчилар учун эпидемиологик жиҳатдан хавфсиз шароитларни таъминлаш, шунингдек, чет эл фуқаролари ва фуқаролиги бўлмаган шахсларнинг фарзандларини қабул қилиш тартибини изчил йўлга қўйишга хизмат қилади», — лойиҳага илова қилинган изоҳ хатида.

Бундан ташқари, боланинг шахсини тасдиқловчи, унинг Россияда бўлиб туриши қонуний экани ва ариза берувчининг бола билан қариндошлигини исботловчи ҳужжатларнинг нусхалари ҳам талаб этилади. Шунингдек, ота-онанинг иш жойи ва шахсий суғурта ҳисобрақами олганини тасдиқловчи ҳужжатлар нусхаларини ҳам тақдим этиш керак бўлади.

Ҳужжатлар рус тилида ёки рус тилига тасдиқланган таржимаси билан бирга бўлиши керак. Агар ҳужжатлар тўлиқ тақдим этилмаса, таълим ташкилоти аризани кўриб чиқмасдан қайтаради.

Таълим вазирлиги таклиф этаётган янгилик қабул қилинса, у 2026 йил 28 июнга қадар амалда бўлади. Ҳозирда болани боғчага қабул қилишда шифокор кўригидан ўтганлик тўғрисидаги ва умумий таҳлилларга оид маълумотнома сўралади.

2024 йил март ойида «Крокус Сити Холл»да юз берган терактдан кейин Россияда мигрантларнинг ҳуқуқларини чеклаш кучайди. Хусусан, Россияда мигрантларни мамлакатдан чиқариб юборишга оид янги махсус режим қабул қилинди, 2025 йил 1 апрелдан бошлаб эса Россия мактабларига рус тилини билмайдиган чет элликларнинг фарзандларини қабул қилиш тўхтатилди.