Bloomberg: Трамп жамоаси Россияга иқтисодий босимларни кучайтириш вариантларини тайёрлади

Америкалик амалдорлар АҚШ президенти Доналд Трамп учун Россияга иқтисодий босим кўрсатишнинг бир қатор вариантларини тайёрлаб қўйди. Бунга Владимир Путин Украинада ўт очишни тўхтатишни кечиктираётгани сабаб бўлмоқда, деб ёзади Bloomberg ўз манбаларига таяниб.

Трамп жамоасининг таклифлари нималардан иборат экани — номаълум. Bloomberg суҳбатдошларининг сўзларига кўра, Трамп ҳозирча қарор қабул қилмаган, чунки урушни якунлаш бўйича дипломатик саъй-ҳаракатлар давом этмоқда. Уларнинг қўшимча қилишича, ҳар қандай қарорни якунда барибир АҚШ президенти қабул қилади.

АҚШ Миллий хавфсизлик кенгаши ва Давлат департаменти агентликнинг изоҳ сўраб йўллаган мурожаатларини жавобсиз қолдирган.

Доналд Трамп бир неча бор Владимир Путин тинчликни хоҳлаши ҳақида гапирган эди, аммо 24 апрел куни кеча Киевга берилган зарбалардан кейин АҚШ президенти бу борадаги фикрларини ўзгартириб, Россияга қарши иккиламчи санкциялар жорий этишни ўйлаб бошлади. Давлат котиби Марко Рубионинг таъкидлашича, ҳозирча санкциялар Вашингтон урушни дипломатик йўл билан якунлашга умид қилаётгани боис жорий этилмаяпти.

Аввалроқ АҚШ сенаторлари Россияга қарши «майдаловчи» санкциялар тайёрлаётгани тўғрисида хабар берилганди. Бу борадаги қонун лойиҳаси нафақат Россияга қарши, балки РФдан нефт, нефт маҳсулотлари, табиий газ ёки уран сотиб олувчи мамлакатлардан импорт қилинадиган маҳсулотларга 500 фоизлик божларни ҳам назарда тутади. Бундан ташқари, АҚШ фуқароларига Россия давлат облигацияларини сотиб олиш тақиқланади.