Техинспекция «Дубай шоколади»да хавфли бактерияларни аниқлади

Fix Dessert Chocolatier савдо бренди остида «Дубай шоколади» сифатида сотилаётган маҳсулот инсон саломатлиги учун хавфли. Техник жиҳатдан тартибга солиш соҳасида назорат инспекцияси шундай хулосага келди.

Қайд қилинишича, инспекция мутахассислари бу маҳсулотнинг назорат харидини амалга оширган ва намуналарни UzTest синов лабораториясига топширган.

Текширувлар натижасида регламентга нисбатан қуйидаги номувофиқликлар аниқланган:

- Мезофил аэроб ва факультатив анаэроб бактериялар (МАФАМ), шунингдек, ачитқи замбуруғларнинг юқори даражадаги мавжудлиги;

- Коли гуруҳидаги бактериялар (БГКП) ва «Сальмонелла 25 г» бактериясининг мавжудлиги (меъёрий ҳужжатларда қатъиян тақиқланган).

«Бундай кўрсаткичлар инсон саломатлиги учун хавфли бўлиб, айниқса, аллергик касалликларни келтириб чиқариши мумкин», дейилади хабарда.

Таъкидланишича, маҳсулотнинг ташқи кўриниши ҳам техник регламент талабларига жавоб бермайди. Хусусан, озиқ-овқат маҳсулотини тамғалаш хавфсизлиги тўғрисидаги умумий техник регламентнинг тегишли бандлари талаблари бузилган.