Коста-Рикада Поас вулқони ҳаракатга келди

Вулқон ҳаракатга келишидан олдин зилзила кузатилмаган, бироқ атрофдаги ҳудудларда олтингугурт ҳиди тарқалган. Вулқон отаётган кул устунлари баландлиги 3-4 кмга етган.

Фото: elcomercio.com

Коста-Рикадаги Поас вулқони ҳаракатга келди. Вулқон отаётган кул устунлари баландлиги 3-4 километрга етмоқда, деб хабар беради El Commersio.

Қайд этилишича, вулқон отилиши майдони 3250 километр квадратни ташкил этадиган Марказий водийнинг исталган нуқтасидан кўринган.

21 апрел куни соат маҳаллий вақт билан 15:00 ҳолатига кўра, яқин атрофидаги аҳоли пунктларига кул тушиши кузатилмаган. Шамол йўналиши сабаб кул Гресия, Сарчи ва Сан-Карлос кантонлари томон ҳаракатланиши мумкин. Поас атрофидаги ҳудудлар ва Торо-Амарило округида хавфнинг «сариқ» даражаси эълон қилинган.

Вулқон ҳаракатга келишидан олдин зилзила кузатилмаган, бироқ атрофдаги ҳудудларда олтингугурт ҳиди тарқалган. Табиий офат Хуан Сантамария номидаги халқаро аэропорт фаолиятига таъсир кўрсатмаган.

Поас вулқони денгиз сатҳидан 2708 метр баландликда жойлашган бўлиб, унинг чўққисида диаметри 1,5 километрга етадиган иккита кратер мавжуд.

Аввалроқ Филиппиндаги Негрос оролида Канлаон вулқони ҳаракатга келгани, ҳудудда учинчи хавф даражаси эълон қилингани тўғрисида хабар берилганди.

#вулқон #Коста-Рика