Тошкентдаги яна бир кўча вақтинча ёпилади

КҲАЙ ва Оққўрғон кўчалари кесишмаси иссиқлик қувурлари алмаштирилиши сабаб 1 майгача ёпилади.

Фото: Veolia Energy

Мирзо Улуғбек туманидаги КҲАЙ ва Оққўрғон кўчалари кесишмаси вақтинча ёпилади. Бу ҳақда Veolia Energy Tashkent компанияси хабар берди.

Қайд этилишича, КҲАЙ бўйлаб Crafers заводи яқини ва 99-мактаб ҳудуди (КҲАЙ ва Оққургон кўчаси кесишмаси) 11 апрелдан 1 майгача ёпилади.

Мазкур ҳудудда 2025–2026 йиллар куз-қиш мавсумига тайёргарлик кўриш ишлари дастури доирасида иссиқлик тармоқларининг қувурларини режа асосида алмаштириш ишлари олиб борилади. Шу муносабат билан мазкур ҳудудда автомобил йўлининг бир бўлагидаги ҳаракатланиш имконияти вақтинча чекланади.

«Йўл маршрутини режалаштираётганда буни эътиборга олишингизни сўраймиз. Тушунишингиз учун миннатдорчилик билдирамиз ва ишлар олиб борилаётган ҳудудда эҳтиёткорликни сақлашга ундаб қоламиз», — дейилади хабарда.

Аввалроқ эскирган иссиқлик қувурлари алмаштирилиши сабаб Юнусобод туманининг Асомов кўчасидаги йўлнинг бир йўлаги, шунингдек, Чилонзор туманидан ўтувчи Лутфий кўчасининг бир қисми вақтинча ёпилиши тўғрисида хабар берилганди.

#Мирзо Улуғбек тумани #КҲАЙ