Волгоградда 11 нафар ўзбекистонлик вақтинча сақлаш марказида сақланаётгани айтилди

Ўзбекистоннинг Ростов-Дон шаҳридаги Бош консулхонаси дипломатлари Россиянинг Волгоград вилоятидаги Хорижий фуқароларни вақтинча сақлаш маркази раҳбарияти ва бу ерда бўлган юртдошлар билан учрашув ўтказди.

Фото: dunyo.info

Марказ раҳбарияти билан кечган мулоқот чоғида ҳозирги кунда мазкур муассасада 11 нафар Ўзбекистон фуқароси вақтинча сақланаётгани маълум қилинди. Россия томони, шунингдек, сўнгги пайтларда Ўзбекистон фуқаролари ишлаш ҳуқуқини берадиган ҳужжатларни ўз вақтида расмийлаштиришга масъулият билан ёндашаётганларини билдирди.

Томонлар марказда бўлган юртдошларга зарур консуллик хизматларини кўрсатиш тартиби ва уларни тез фурсатларда Ўзбекистонга қайтариш масаласи юзасидан фикр алмашдилар.

Музокаралар натижасида ушбу марказда бўлиб турган барча юртдошларни муддатидан олдин оиласи бағрига қайтариш бўйича келишувга эришилди.

Дипломатлар, шунингдек, муассасада сақланаётган ватандошлар билан алоҳида учрашув ўтказдилар.

Ватандошларга қонуний меҳнат миграциясини амалга ошириш тартиби, қабул қилувчи давлат қонунчилигига риоя қилиш зарурлиги таъкидланди.

#Ростов-Дон #Волгоград