Anadolu Isuzu SamAutoʼнинг назорат пакетини сотиб олмоқчи

Туркиянинг Anadolu Isuzu Otomotiv Sanayi ve Ticaret A.Ş. автомобил ишлаб чиқарувчиси Ўзбекистон давлат активларини бошқариш агентлигига Самарқанд автомобил заводининг (SamAuto) назорат улушини сотиб олиш бўйича расмий таклиф билан чиқди. Бу ҳақда Gazeta.uz ахборотни оммавий ошкор қилиш платформасида (KAP) эълон қилинган баёнотга таяниб хабар берди.

Инвестор Япониянинг Isuzu компанияси лицензияси асосида автомобил ва автобуслар ишлаб чиқарувчи SamAuto компаниясининг 75,2 фоизини сотиб олмоқчи.

Қолган қисми Япониянинг Itochu Corporation ва Isuzu Motors компанияларига тегишли — уларнинг ҳар бири 12,4 фоиздан улушга эга.

2024 йил июн ойида томонлар битим имкониятларини баҳолаш ва тегишли тартиб-таомилларни амалга ошириш учун ўзаро англашув меморандумини имзолаган.

7 октябр куни инвестициялар, саноат ва савдо вазири Лазиз Қудратов Туркиянинг Anadolu Isuzu автомобил гуруҳи президенти Бора Кочак билан учрашган.

Томонлар компанияни Ўзбекистондаги хусусийлаштириш давлат дастурида иштирок этишга жалб қилиш ва автомобилсозлик соҳасидаги лойиҳаларни амалга оширишнинг амалий жиҳатларини муҳокама қилган.

Ноябр ойида Anadolu Isuzu мажбурий таклифни тайёрлашга қаратилган молиявий, ҳуқуқий ва солиқ аудитини бошлаган. Компания келишувни амалга ошириш жараёнида жамоатчиликни хабардор қилишини таъкидлади.

Anadolu Isuzu 1984 йилда ташкил этилган, Туркиянинг Anadolu Group ҳолдинги шуъба корхонаси бўлиб, автобуслар ва тижорат транспорти соҳасидаги энг йирик корхоналардан бири ҳисобланади. Anadolu Groupʼнинг Ўзбекистондаги шуъба корхоналари Тошкентда Coca Cola заводлари ва рақамли гистология лабораториясига эгалик қилади.