Фавқулодда вазиятлар вазирига ўринбосар ва ФВВ академиясига янги бошлиқ тайинланди

Ўзбекистон президентининг қарори билан Рустам Жумаев фавқулодда вазиятлар вазирининг ўринбосари – Молия, таъминот ва қурилиш департаменти бошлиғи вазифасини бажарувчи лавозимига тайинланди. Бу ҳақда ФВВ матбуот хизмати хабар берди.

Тайинловга қадар Рустам Жумаев Ҳисоб палатасининг турли лавозимларида фаолият юритган.

Шунингдек, президент фармойиши билан полковник Музаффар Мамасиддиқов Фавқулодда вазиятлар вазирлиги академияси бошлиғи лавозимига тайинланди.

Тайинловга қадар у Ҳуқуқни муҳофаза қилиш академияси бошлиғи ўринбосари лавозимида фаолият юритган.

Шу кунга қадар Фавқулодда вазиятлар вазирлиги академияси бошлиғи лавозимида фаолият юритиб келган генерал-майор Равшан Ҳайдаров Ҳайдарович нафақага чиқиши муносабати билан лавозимидан озод этилган.

Эслатиб ўтамиз, 25 феврал куни президент фармони билан бош прокурор ўринбосари — ҳарбий прокурор Ботир Қудратхўжаев фавқулодда вазиятлар вазири этиб тайинланган ва унга генерал майор ҳарбий унвони берилган эди.

Март бошларида эса Хуршид Сотиев фавқулодда вазиятлар вазирининг ўринбосари — Фавқулодда вазиятлар профилактикаси департаменти бошлиғи вазифасини бажарувчи, Нуриддин Қодиров фавқулодда вазиятлар вазирининг ўринбосари – Маънавий-маърифий ишлар ва кадрлар билан таъминлаш департаменти бошлиғи вазифасини бажарувчи лавозимига тайинланганди.