Россия Тергов қўмитаси «Крокус» теракти ташкилотчиларини маълум қилди

Россия Тергов қўмитаси бир йил аввал Москва вилоятидаги «Крокус Сити Холл» концерт залида содир қилинган теракт «Россиядаги вазиятни беқарорлаштириш мақсадида» дўстона бўлмаган давлат махсус хизматлари томонидан режаланган ва уюштирилган деган хулосага келди. Бу ҳақда Тергов қўмитаси расмий вакили Светлана Петренко маълум қилди, бироқ қайси давлат эканига аниқлик киритмади.

«Теракт содир қилиш учун халқаро террорчилик ташкилоти аъзолари жалб қилинган. Терактни бевосита Марказий Осиёнинг 6 нафар фуқароси уюштирган, уларнинг бир қисми тахаллус остида ҳаракат қилган. Улар хорижда ва сиртдан ҳибсга олиниб, қидирувга берилган», деб унинг сўзларидан иқтибос келтирди РБК. Аммо Петренко бу қайси халқаро террорчилик ташкилоти эканига аниқлик киритмади.

Тергов маълумотларига кўра, бу шахслар теракт содир этганликда гумон қилинаётган Тожикистон фуқаролари Далержон Мирзоев, Саидакрам Ражабализода, Шамсиддин Фаридуни ва Муҳаммадсобир Файзовни ўз сафига жалб қилган ва уларни хорижда тайёргарликдан ўтказган. Тўрт нафари ҳам ҳибсга олинган.

Бундан ташқари, терактга шерикликда айбланаётганлар ҳибсда: жиноятчиларга уй-жой ижарага олишга ёрдам берган, транспорт, қурол-яроғ билан таъминлаган ёки террорчилик фаолиятини молиялаштирганлар.

«Айни пайтда террорчилик жиноятларини содир этишда айбланаётган 19 нафар шахсга нисбатан тергов ҳаракатлари якунланиб, улар ҳибсда сақланмоқда ва иш материаллари билан танишишда давом этмоқда. Бир қатор бошқа айбланувчилар қидирувга берилган», деб қўшимча қилди Петренко.

2024 йил 22 март куни Москва вилоятининг Красногорск шаҳридаги «Крокус Сити Холл» концерт залида теракт содир бўлди. 4 нафар ҳужумчи бинодаги одамларга қарата автоматлардан ўт очди ва концерт залига ўт қўйди. Ҳужум оқибатида 145 киши ҳалок бўлди, 550 нафардан ортиғи жароҳатланди.