Британия ҳукумати суд орқали Абрамовичнинг 2 млрд фунтини тортиб олмоқчи

Британия ҳукумати «Челси» футбол клубини сотишдан тушган 2 миллиард фунт стерлингдан ортиқ маблағни блокдан чиқариш ва уларни Украина учун ёрдамга йўналтириш мақсадида россиялик миллиардер Роман Абрамовични судга беришга тайёрланмоқда.

The Guardian манбаларидан бирининг таъкидлашича, ҳукумат Абрамовични судга бериши мумкин, чунки у билан ҳукумат ўртасида бу пулларни қаерга йўналтириш борасида келишмовчилик мавжуд. Ҳозирча якуний қарор қабул қилинмаган, аммо Британия ҳукумати Доналд Трамп Украинага ҳарбий ёрдам кўрсатишни музлатиб қўйганидан кейин молиялаштиришни давом эттириш учун ушбу пулларни қўлга киритишга уринмоқда.

Россиялик миллиардер Россия ва Украина уруши бошланганидан кейин Британия ҳукуматининг босими остида «Челси»ни 2022 йилда 2,5 миллиард фунт стерлингга сотган эди. Шу билан бирга, у ўша вақтда санкциялар остида бўлган ва клубни сотиш учун лицензия қўлга киритилган маблағлар урушдан жабр кўрганларни қўллаб-қувватлашга йўналтириш шарти билан берилганди. Айни вақтда пуллар Британия банкидаги ҳисобрақамда музлатилган ҳолатда турибди ва уни тақсимлаш билан шуғулланадиган янги мустақил фонд тузилмоқда. Шундан буён ҳукумат ва Абрамович ўзаро муросага кела олмаяпти: вазирлар мазкур маблағлар фақат Украина учун сарфланиши керак демоқда, Абрамович эса уларни мамлакатдан ташқарига ҳам йўналтириш мумкин деб ҳисоблаяпти.

Абрамович Буюк Британия ҳукуматининг жиддий босимига дуч келган. Январ охирларида у 20 йил давомида хеж-фондга киритган инвестициясидан олган даромадлари сабаб солиқ органларидан 1 миллиард фунтгача қарздор бўлиб қолгани тўғрисида хабарлар тарқалганди.

Абрамовичнинг пуллари Европа давлатлари келиша олмаётган ягона баҳсли мавзу эмас. Улар Россиянинг бутун Европа бўйлаб музлатилган 350 миллиард долларидан фойдаланиш бўйича ҳам муросага кела олмаяпти. Буюк Британия ташқи ишлар вазири Дэвид Лэмми ушбу активларни мусодара қилиб, Украинага ёрдам учун ёки АҚШдан қурол сотиб олишга йўналтиришни таклиф қиляпти. Аммо Франция ва Германия бу ҳуқуқий тамойилларни бузиши мумкинлиги сабаб Британия режасига қарши чиқмоқда.

Аввалроқ Британия собиқ бош вазири Риши Сунак ҳам Украинани қайта тиклаш Ғарб солиқ тўловчилари ҳисобидан эмас, балки Россия маблағларидан амалга оширилиши лозимлигини таъкидлаган эди.