Skype тез орада ёпилиши мумкин

Хизматнинг яқин орада ёпилиши ҳақидаги хабар янги версиясида қайд этилган.

Фото: Shutterstock

Microsoft 2025 йил май ойида Skype хабар алмашиш ва видеоқўнғироқлар хизматини ёпиши мумкин. Бу ҳақда XDA Developers портали ёзди.

Портал ўқувчиларидан бири Windows учун Skype хизматининг янги бета-версиясида хизматнинг ёпилиши ҳақидаги маълумотлардан иборат код пайдо бўлганини пайқади.

«Май ойидан бошлаб Skype ишламайди. Teams орқали қўнғироқ қилиш ва суҳбатлашишда давом этинг», дейилади кодда. Шундан сўнг «баъзи дўстларингиз аллақачон Teams иловасидан фойдаланмоқда» деган ёзув келади.

Microsoft компанияси Skype ёпилишини расман эълон қилмади.

Skype 2003 йилда ишга туширилган ва швед компанияси Tele2 собиқ ходимлари Никлас Зеннстрöм ва Янус Фриис иштирокида эстониялик дастурчилар жамоаси томонидан яратилган. 2011 йилда ушбу хизмат Microsoft томонидан 8,5 миллиард долларга сотиб олинди. 2019 йилда Microsoft бизнес учун Skype хизмати фаолияти тўхтатилишини (бу 2021 йилда содир бўлди) ва ташкилотлар Microsoft Teams хизматига ўтиши кераклигини эълон қилди.

#Microsoft #Skype #Teams