Ўзбекистон импорт бозорида электромобил ва гибрид автомобиллар етакчилик қилмоқда

Мазкур нашрларда маълум қилинишича, 2024 йил якунларига кўра, Ўзбекистонда илк бор бензинда юрувчи автомобилларга нисбатан электромобиллар ва гибрид шаклдаги автомобиллар импорти устунлик қилган.

Қайд этилишича, бир йил ичида мамлакатга умумий қиймати 1,9 миллиард АҚШ долларига тенг бўлган 80 минг 235 та енгил автомобил олиб келинган. Бу кўрсаткич 2023 йилга нисбатан 7 фоизга кам.

"Бензин двигателига эга автомобиллар импорти 36,3 фоизга камайиб, 32 минг 928 тани ташкил этди. Импорт қилинган бензинда юрувчи автомобилларнинг улуши эса 64,4 фоиздан 44,2 фоизга тушган, – деб хабар берган Украина ОАВ. – Гибрид автомобиллар импорти 42 фоизга ошиб, 17 минг 480 тага етган. Уларнинг жами импортдаги улуши 15,3фоиздан 23,4 фоизга ошди".

Таъкидланишича, импорт қилинаётган электромобилларнинг ўртача нархи деярли уч бараварга арзонлашган. Гибрид автомобиллар нархлари ҳам бироз арзонлашган, - уларнинг ўртача нархи 17,6 фоизга тушган. Бензинда ишлайдиган автомобиллар нархида пасайиш 6 фоизни ташкил этди.

"Экологик транспортга ўсиб бораётган талаб солиқ ва божхона имтиёзлари билан рағбатлантирилмоқда. Электромобиллар импорти акциз, божхона тўловлари ва автомобиль йиғимларидан озод қилинган. Электр ва гибрид шаклдаги автомашиналардан фойдаланувчи такси ҳайдовчилари 2030 йилгача лицензия йиғимларидан озод қилинган", – деб ёзган Украина электрон нашрлари.