“Осон ишдан яхши даромад кўряпмиз” – Британияда кўчат саралаб 3 минг доллар топаётган ўзбек

Ота-онасидан эрта ажралган Жасурбек Ҳайдарқулов пул топиш учун коллежни битирибоқ Россияга кетган. 10 йилдан кўпроқ у ерда ошпаз бўлиб ишлаган. “Бир ойда атиги 2 марта дам олардик, якшанба куни ҳам иш эди”, деб эслайди у ўша йилларни. Жасурбек 2 ойдан бери Буюк Британияда, қишлоқ хўжалиги соҳасида тирикчилик қиляпти. У Kun.uzʼга берган интервюсида қандай қилиб Уэлсга кетгани, ҳужжатларни тайёрлаш каби жараёнлар ҳақида гапириб берди.

{Yii::t(}

Ўтказиб юбориш 6s

Ўтказиб юбориш

Жасурбек Ҳайдарқулов 1991 йилда Сирдарё вилояти Ховос туманида туғилган. Ўша ерда касб-ҳунар коллежини битириб, Россияга ишлашга кетган. Рус ўлкасида 10 йилдан ортиқ вақт ошпазлик ортидан тирикчилик қилган ва кейинроқ Ўзбекистонга қайтган.

2023 йилда Британияда қишлоқ хўжалигида ишлаш учун эълон қилинган танловда қатнашиб, 2024 йил январ ойида Уэлс (Wells) шаҳрига учиб кетган. Ҳозирда у ердаги британ фермаларидан бирида кўчат саралаб, ойига ўртача 2,5 минг фунт стерлинг (3,2 минг доллар) топмоқда.

“Буюк Британияга тил билмасдан келишни ҳеч кимга тавсия қилмайман”

[2023 йил ноябр-декабр ойларида] Ташқи миграция агентлигининг расмий каналида эълон қилинган хабарни кўргач, Буюк Британияга кетиш истаги пайдо бўлди. Кейин Англияга кетиш учун секин-секин ўз устимда ишлаб, инглиз тилини ҳам оз-моз ўрганишни бошладим. IELTS сертификатим йўқ, инглиз тилини мулоқот даражасида ўрганганман.

Россиядан Ўзбекистонга қайтганимдан кейин агентлик эълон қилган хабар бўйича рўйхатдан ўтдим. Шундан сўнг электрон почтамизга суҳбатга қабул қилинганимиз ҳақидаги хабар юборилди. Рус тилида бўлган суҳбатдан ўтганимиздан бир ой ўтгач, бизга Англиядаги иш берувчилар томонидан ишга таклифнома юборилди. Агентлик томонидан йўлланма берилгач, визага топширдик, тахминан, 500 доллар тўлови ҳам бўлди ва бир ҳафта узоғи ўн кун ичида визамиз чиқди. Иш берувчи томонидан ҳеч қандай ортиқча ҳужжатлар талаб қилингани йўқ. Умуман олганда, Ўзбекистонда рўйхатдан ўтганимиздан 2 ой ўтгач, Англияга етиб келдик. Тил сертификати талаб қилингани йўқ, фақатгина мулоқот қилиш учун керакли даражада ўрганганман. Лекин бу ер [Буюк Британия]га тил билмасдан келишни ҳеч кимга тавсия қилмайман. Чунки бу ерда биз билан бирга, турли миллат вакиллари: Руминия, Молдавиядан келганлар ҳам ишлайди, шунинг учун рус ва инглиз тилини билиш муҳим.

“Бу ерда инсон қадри жуда баланд”

Биз ишлаётган ферма кўчат етиштириш билан шуғулланади, биз шу олиб келинадиган кўчатларни саралаймиз. Ишимизда қўл меҳнати камроқ, асосий ишларни техникалар бажаради. Ҳар куни турли ўлчамлар бор, кўчатлар шу айтилган ўлчамларга саралаб, аппаратларга қўйиб юборамиз. Кейинги босқичларда кўчатлар дезинфекцияга юборилади. Шундан сўнг тахланиб, мижозларга юборилади. Бизнинг ишимиз фақат саралаб туриш, у қадар қийин эмас.

Кунлик иш вақтимиз эрталаб 07:45 дан 16:30 гача, 8 соат давом этади. Шароитлар жуда ҳам яхши. Ётоқхоналар иш берувчи томонидан ташкиллаштирилган, ҳар бир хонада 2 киши яшаймиз. Машина ҳам ажратилган биз учун, ишдан кейин ёки дам олиш кунлари бемалол шаҳарга ё бошқа жойга чиқишимиз мумкин. Умуман олганда, ишни оғир деб айтолмайман, мен тушган ферма шундай шароитларга эгадир, балки.

Ота-онам ўтиб қолган, оиламиз эса қийналиб қолган эди, ўшанда шу сабаб ҳам ишлаш учун Россияга кетишга мажбур бўлганман. У ерда оғир шароитда ишлардик, 12 соатлик иш, бир ойда бир ёки икки кун дам олиш бўларди. Бу ерда эса ҳафтасига 40 соатдан ошиқ ишласак, бир ярим баробар ҳақ тўланади. Шанба куни тушгача иш бўлади, тушдан кейин ва якшанба куни дам олиш. Иш осон, даромадимиз ҳам яхши. Россияда бизга яхши муносабатда бўлишмасди, бу ерда эса инсон қадри, ҳуқуқлари жуда баланд, директоримизнинг ўзи келиб саломлашиб, ҳол-аҳвол сўраб кетади.

Солиқ ва ётоқхона харажатларини ушлаб қолгандан ташқари 2200 фунт стерлингдан 2500 фунт стерлинггача оламиз, яъни бу 2800-3200 доллар дегани. Озиқ-овқат учун ҳам ҳафтасига 20 фунт стерлинг ишлатамиз, ётоқхонамиз ферманинг ўзида бўлгани учун йўлкирага пул сарфламаймиз.

Келгуси режалар

[Буюк Британиядаги иш берувчи билан тузилган] шартномамиз 6 ойлик бўлиб, шундан сўнг Ўзбекистонга қайтишимиз керак бўлади. Агар иш берувчига маъқул келсак, 6 ойдан кейин яна чақиришлари мумкин. Бу ерга яна келиш ниятимиз бор. Ўзбекистонда пул топиш учун Россияда, Европада ўрганганларим асосида бирорта бизнес бошламоқчиман. Ҳозирда топган пулларимни Ўзбекистонда уй қуришга сарфлаяпман, ҳозирча шу билан машғулман.

Дилшода Шомирзаева тайёрлади.
Тасвирчи Мирвоҳид Мирраҳимов,
Монтаж устаси Муҳиддин Қурбонов.