Асака туман прокурори ўринбосари ва ИИБ тергов бўлинмаси собиқ ходимини қўлга олди

Андижон вилояти Асака туманида мансабдор шахслар билан боғлиқ ноқонуний ҳолатлар аниқланди.

Фото: Видеодан кадр

Ҳуқуқни муҳофаза қилувчи органлар томонидан ўтказилган тезкор тадбирда, Асака тумани ички ишлар бўлими тергов бўлинмаси собиқ ходими Асака тумани прокурори ўринбосари орқали мазкур туман прокуратураси иш юритувида бўлган жиноят иши доирасида қурилиш фирмаси раҳбарига нисбатан қўлланилган “қамоқ” эҳтиёт чорасини ўзгартириб, тергов ҳаракатлари давомида аниқланган зарар суммасини қайта назорат-ўлчов тадбирлари ўтказиш орқали камайтириб бериш эвазига, айбланувчининг яқинларидан 15 минг АҚШ доллари олаётган вақтида ашёвий далиллар билан қўлга олинди.

Ҳолат юзасидан тўпланган материаллар асосида собиқ терговчига нисбатан Жиноят Кодексининг 168-моддаси 4-қисми “а” банди ва 28,211-моддаси 3-қисми “а” банди билан жиноят иши қўзғатилди.

Андижон вилоят прокуратураси томонидан олиб борилган тергов ҳаракатлари давомида туман прокурори ўринбосари ҳам ушбу жиноят ишига айбланувчи тариқасида жалб қилинди. Ҳозирда уларга нисбатан “қамоқ” эҳтиёт чораси қўлланган.

#Асака #ДХХ