Apple компанияси iPad ва iPad Pro планшетларининг янги авлодини тақдим этди

Октябр ойи охирида сотилиши бошланадиган қурилмалар эргономика ва ишлаш бўйича бир қатор ўзгаришларга учради.

Фото: Apple

Apple компанияси янги авлод iPad ва iPad Pro планшетларини тақдим этди.

Янги iPad моделининг асосий хусусияти стандарт USB-C улагичининг ўрнатилиши бўлди. У компаниянинг анъанавий Lightning улагичи ўрнини эгаллади. Бундан ташқари, гаджет нозикроқ рамкали 10,9 дюймли дисплей, шунингдек, ултра кенг бурчакка эга 12 мегапикселли олд камерага эга бўлди.

Шунингдек, планшет симли қулоқчин улагичи ва «Home» тугмасидан айрилди. Унинг функциялари бармоқ изи сканери билан бирга қувват тугмасига ўтказилди.

Планшетга A14 Bionic процессори ўрнатилган, ундан iPad Air гаджетида ҳам фойдаланилган эди. Қурилма юқори тезликдаги Wi-Fi 6 симсиз локал ва 5G мобил алоқа тизимларида ишлай олади. Қўшма Штатларда унинг нархи 449 доллардан бошланади.

iPad Pro планшетининг янги авлоди М2 чипсетини олди. У графика ва ахборотни қайта ишлашни сезиларли даражада яхшилаган, шунингдек, қурилманинг умумий тезлигини оширган.

Бундан ташқари, планшетнинг сенсорли экрани янгиланди, у энди Apple Pencil стилуси ҳаракатини экран юзасидан 12 мм баландликда ҳам тиниқ сезади.

Янги iPad Pro аввалгидек, диагонали 11 ва 12,9 дюймли дисплейли, 8 ёки 16 Гб тезкор хотирали, шунингдек, ҳар хил ҳажмдаги ички хотирага эга турли версияларда сотувга чиқарилади. Қўшма Штатларда унинг нархи версиясига қараб 799 доллардан 1299 долларгача. Янги iPad ва iPad Pro расман 26 октябрдан сотувга чиқади.

#Apple #iPad #iPad Pro