Tencent’нинг энг йирик акциядори компаниянинг 15 миллиард долларлик акцияларини сотди

Хитойнинг Tencent интернет-корпорациясининг энг йирик акциядори ҳисобланган Prosus инвестицион жамғармаси компаниянинг 14,7 млрд долларлик акцияларини сотганини эълон қилди.

Нидерланд жамғармаси Хитой компаниясининг 192 млн.дона акциясини сотган, бу эса компания умумий акцияларининг 2 фоизини ташкил қилади. Шундан кейин Prosus’нинг Tencent’даги улуши 30,9 фоиздан 28,9 фоизгача қисқарган, бироқ у компаниянинг энг йирик акциядори бўлиб қолди. Tencent’нинг жамғармага тегишли улуши 239 млрд долларга баҳоланади. Инвестицион жамғарма яқин 3 йил ичида Tencent акцияларини бошқа сотмасликка ваъда берган.

Prosus 2019 йилда ташкил этилган ва унга ЖАРнинг Naspers ҳолдингига қарашли хорижий интернет-активлар бирлаштирилган. Naspers онлайн-тўловлар, интернетдаги савдо платформалари, таом ва товарлар етказувчи онлайн-сервислар, ижтимоий тармоқларга ихтисослашган кўплаб компанияларда улушларга эга. Naspers Хитой компаниясига 2001 йилда 32 млн доллар сармоя киритган.

Prosus’нинг нақд пул захиралари Tencent акцияларини сотганидан кейин деярли 4 маротаба ошади. Жамғарма 2020 йил сентябрида 4,6 млрд долларга эга бўлган.

Жамғарма акцияларни сотишдан олган маблағни янги интернет-корпорацияларга сармоя қилмоқчи. Таъкидланишича, маблағлар Ҳиндистоннинг онлайн-савдо тармоғига йўналтирилиши мумкин.