Обама Сурия инқирозига оид янги топшириқ берди

Фото: Reuters/Carlos Barria

АҚШ президенти Барак Обама мамлакат Миллий хавфсизлик кенгашининг навбатдаги йиғилишини ўтказган. Унда Суриядаги вазият ҳамда ИШИД террорчилик гуруҳини заифлаштириш ва батамом йўқ қилиш масаласи муҳокама этилган. Бу ҳақда, Оқ уй матбуот хизмати маълум қилмоқда.

Кенгаш йиғилишида президент ғарбий Суриядаги зўравонликлар бўйича иттифоқчилар ҳамда ҳамкорлар билан олиб борилаётган музокаралар, шунингдек, Асад тузумининг ўз халқига нисбатан қўллаётган қақшатқич кампаниясидан бохабар қилинган.

Президент Обама Россия билан икки томонлама алоқа каналлари узилганига қарамай, ушбу инқирозни ҳал этишда иштирок этаётган давлат билан кўп томонлама музокараларни давом эттириш натижасида узоқ муддат давомида зўравонликларга йўл қўймасликка эришиш топшириғини берган.

Президент шунингдек, АҚШга террористик ҳужумларнинг олдини олиш ва ИШИД ҳамда "Ал-Қоида"дан келиб чиқувчи таҳдидларга қарши кураш устувор мақсад эканини таъкидлаган.

#АҚШ #ИШИД #Сурия #Барак Обама #миллий хавфсизлик