Россия 30 кунлик оташкесимга рози бўлмаса, қўшимча санкцияларга дучор бўлиши мумкин

АҚШ республикачи сенатори Линдси Грэм Россия 30 кунлик оташкесимга рози бўлишига умид қилмоқда. Аммо агар бу амалга ошмаса, АҚШ Россияга қарши санкциялар жорий қилиши керак. Бу ҳақда у ижтимоий тармоғидаги саҳифасида ёзди.

«Украина 30 кунлик оташкесим ҳақидаги таклифга рози бўлганини эшитганимдан жуда мамнунман. Трамп жамоаси жуда яхши иш қилди. Умид қиламанки, Россия ҳам бунга эргашади. Агар Россия рад этса, биз уларга санкциялар киритишимиз керак», деди Грэм.

Сенаторнинг таъкидлашича, бу санкциялар нафақат Россияга, балки Россия товарлари, жумладан, нефть, газ ва уранни сотиб олувчи давлатларга ҳам таъсир қилиши керак.

«Россия Украинага шафқатсизларча бостириб кириши оқибатида енгиб бўлмайдиган иқтисодий азобни анча олдин ҳис қилиши керак эди. Мен президент Доналд Трампнинг бу ваҳший урушни имкон қадар тезроқ тугатишга қаратилган саъй-ҳаракатларини олқишлайман», деб таъкидлади Грэм.

Аввалроқ Линдси Грэм АҚШ шу ҳафтада Россияга қарши янги санкциялар жорий этишини айтганди. Унга кўра, агар россияликлар музокара столига ўтирмаса, АҚШ президент Трамп таклиф қилганидек, санкцияларни кучайтирилиши керак.

Шунингдек, Буюк Британия Кремль элитасига қарши янги шахсий санкциялар жорий этиши хабар қилинганди. Бундай чекловлар Кремль элитасининг номаълум муддатга Буюк Британияга киришига тўсқинлик қилади.