Putin Ukrainaga to‘g‘ridan to‘g‘ri muzokaralarni tiklashni taklif qildi

«Kiyev rasmiylariga 2022 yil oxirida ular tomonidan to‘xtatilgan muzokaralarni qayta boshlashni taklif qilamiz. To‘g‘ridan to‘g‘ri muzokaralarni, hech qanday dastlabki shartlarsiz boshlash lozimligini ta’kidlayman. Muzokaralarni kelayotgan payshanba, 15 may kuniyoq Istanbulda boshlash taklifini bildiramiz. Ular oldin ham shu yerda o‘tkazilgan va to‘xtatilgan edi», — deydi Putin 10 may kuni kechasi Kremldagi chiqishida.

Putin, shuningdek, Turkiya prezidenti Rajab Toyyib Erdo‘g‘an bilan ushbu muzokaralarni tashkil qilish masalasida suhbatlashishni rejalashtirayotganini ma’lum qildi.

«Ertaga bizda Turkiya prezidenti janob Erdo‘g‘an bilan suhbat rejalashtirilgan. Men undan muzokaralar o‘tkazilishi uchun Turkiyada sharoit yaratib berishini iltimos qilaman. Umid qilamanki, u Ukraina bo‘yicha tinchlik yo‘lini izlashga yordam berish istagini tasdiqlaydi», — deydi Putin.

Putin, shuningdek, Rossiya Ukraina bilan «jiddiy muzokaralarga tayyor» ekanini ta’kidladi.

«Bu muzokaralarning maqsadi — mojaroning asosiy sabablarini bartaraf etish va uzoq muddatli, mustahkam tinchlikka erishishdir. Muzokaralar davomida yangi sulhlar yoki o‘t ochishni to‘xtatish bo‘yicha haqiqiy kelishuvlarga ham erishish mumkinligini istisno etmaymiz», — deya qo‘shimcha qiladi Rossiya prezidenti.

10 may kuni Ukraina rasmiylari dushanba kunidan boshlab «quruqlikda, havoda va dengizda kamida 30 kunlik to‘liq va so‘zsiz o‘t ochishni to‘xtatish»ga tayyor ekanliklarini e’lon qildi. Bu qaror Fransiya prezidenti Emmanuel Makron, Polsha bosh vaziri Donald Tusk, Buyuk Britaniya bosh vaziri Kir Starmer va Germaniya muxolifati yetakchisi Fridrix Mersning Kiyevga tashrifidan so‘ng ma’lum qilindi.

Kiyevdagi muzokaralardan keyingi matbuot anjumanida Buyuk Britaniya bosh vaziri Kir Starmer agar Vladimir Putin tinchlik haqida o‘ylayotgan bo‘lsa, hozir — bu niyatni namoyish etish uchun eng yaxshi vaqtligini ta’kidladi. «Putin tinchlik o‘rniga shartlar qo‘ymoqda, o‘t ochishni to‘xtatish o‘rniga harbiy parad o‘tkazdi, bu bilan yana bir bor chaqiriq tashlamoqda… Agar Putin tinchlik yo‘liga qaytmasa, biz javob qaytaramiz. Prezident Tramp bilan birgalikda Ukraina mudofaa salohiyatini yanada kuchaytiramiz va Rossiyani muzokara stoliga majburlaymiz», — degandi Starmer.