Rossiya TIV Moskvada Qirg‘iziston fuqarolari tahqirlanganiga izoh berdi

Rossiya Tashqi ishlar vazirligi xavfsizlik kuchlarining Moskvadagi «Bodrost» hammomida Qirg‘iziston fuqarolariga qarshi o‘tkazilgan reydi «jamoat joylarini rejali tekshirish» bo‘lganini ma’lum qildi.

Vazirlik ma’lumotlariga ko‘ra, hammomda qo‘lga olingan 25 kishi mamlakat qonunchiligini buzgan holda Rossiya hududida bo‘lib kelgan, ayrimlari esa «radikal guruhlarga aloqadorlikda gumonlanmoqda».

TIVning qayd etishicha, reyd davomida «chet el fuqarolari huquq-tartibot organlari xodimlariga qarshilik ko‘rsatgan», shu bois «tegishli choralar ko‘rilgan». Vazirlikka ko‘ra, kuch tuzilmalari xodimlari «Rossiya qonunchiligiga muvofiq mavjud vakolatlari doirasida» harakat qilgan.

O‘z navbatida Qirg‘iziston ombudsmani Jamila Jamanbayeva Rossiya inson huquqlari bo‘yicha vakili Tatyana Moskalkova bilan uchrashuvda reyd videosini ko‘rish chog‘ida «huquqni muhofaza qiluvchi organ xodimlari tomonidan kuch qo‘llashning mutanosibligi va asoslangani borasida savollar tug‘ilgani»ni bildirgan.

Moskvadagi «Bodrost» hammomida Qirg‘iziston fuqarolari 11 aprel kuni qo‘lga olingan edi. E’lon qilingan videolardan birida odamlar xona bo‘ylab emaklab yurishga majburlangan, qolganlar esa yuzi yerga qarab yotqizilgan. Guvohlardan birining aytishicha, hammomda odamlar kaltaklangan.

Rossiyaning Bishkekdagi elchisi Sergey Vanukov fuqarolarning ommaviy ravishda qo‘lga olinishi sabab Qirg‘iziston TIVga chaqirtirilgan. Rossiya elchisiga hammomda o‘tkazilgan amaliyotning huquqiy asoslari haqida ma’lumot berish, shuningdek, qo‘lga olingan fuqarolarga nisbatan kuch ishlatish sabablarini tushuntirish so‘ralgan rasmiy nota topshirilgan.