Москвада 9 майгача интернетга кириш чекланиши мумкин

Шу ҳафта Москвада Иккинчи жаҳон урушида фашистлар Германияси устидан қозонилган ғалабани нишонлаш тадбирлари муносабати билан интернетга кириш чекланиши мумкин. «Интернетга кириш давом этаётган байрам тадбирлари хавфсизлигини таъминлаш муносабати билан чекланиши мумкин», — дея 5 май, душанба куни тарқатилган Фавқулодда вазиятларнинг олдини олиш ва бартараф этиш бўйича ягона давлат тизимининг СМС хабаридан иқтибос келтиради ТАСС.

Шу куни Москва ва Москва вилоятида уяли алоқада узилишлар юз берди. Хусусан, «Билайн», «МТС», «Мегафон» ва «Т2» уяли алоқа операторлари тармоқларининг ишида узилишлар қайд этилган. ТАСС «Билайн» ва «Мегафон» вакилларига таяниб, Москвадаги носозликлар компанияларга боғлиқ бўлмаган сабабларга кўра содир бўлаётганига ишора қилмоқда.

Бундан ташқари, мобил интернетга уланишда узилишлар мавжуд, буни Downdetector хизмати маълумотлари тасдиқлайди. Интернет операторлари тармоққа кириш учун Wi-Fi'дан фойдаланишни тавсия қиляпти.