Руминияда қайта президентлик сайловлари бошланди

Сайловларнинг олдинги натижалари россияпараст номзод ғалаба қозонганидан кейин бекор қилинган эди.

Фото: Getty images

Руминияда президентлик сайловларининг биринчи тури бошланди, деб хабар беради BBC.

Сайлов участкалари маҳаллий вақт билан соат 07:00 да очилган ва улар 21:00 гача ишлайди. Овоз бериш мумкин бўлган номзодлар сони — 11 киши.

Сўровномалар биринчи ўринни ўта ўнг евроскептик Жорже Симионга бермоқда. Унинг асосий рақиблари — Бухарест мэри Никушор Дан ва амалдаги парламент коалицияси қўллаб-қувватлаётган Крин Антонеску.

Тахминларга кўра, номзодларнинг ҳеч бири биринчи турда ғалаба қозониш учун етарли бўладиган 50 фоиздан ортиқ овозни тўплай олмайди. Сайловларнинг иккинчи тури 18 май куни бўлиб ўтади.

Бу Руминияда охирги бир йил ичида иккинчи бор президентлик сайловларини ўтказишга уриниш ҳисобланади. Бундан олдинги овоз бериш жараёнлари 2024 йил ноябрда бўлиб ўтганди — ўшанда биринчи ўринни россияпараст сиёсатчи Кэлин Жоржеску эгаллаган эди. Аммо махсус хизматлар уни ижтимоий тармоқлар орқали жамоатчилик фикрини манипуляция қилишда айблади. Таъкидланишича, Россия Жоржескуни реклама қилиш учун минглаб TikTok аккаунтларидан фойдаланган. Натижада Руминия Бош прокуратураси натижаларни сохталаштириш бўйича иш очган, Конституциявий суд эса сайлов натижаларини бутунлай бекор қилган эди.

Март ойида Руминия Марказий сайлов комиссияси, кейин эса суд Жоржескуга сайловларда номзодини яна илгари суришга рухсат бермади.

#Руминия #сайловлар