Боливияда бортида беш киши бўлган самолёт ғойиб бўлди

Ҳаво кемаси учувчиси 30 апрел куни фалокат сигналини берган ва шундан кейин алоқага чиқмаган. Самолётни қидириш ишларига мамлакат ҳарбийлари ҳам жалб этилган.

Боливия шимолида бортида беш киши бўлган Cessna 72M Skyhawk самолёти ғойиб бўлди. Бу ҳақда мамлакат президент Луис Арсе ўзининг Telegram-канали орқали хабар берди.

«Самолёт Баурес аҳоли пункти ва Бени департаментидаги Тринидад шаҳри ўртасидаги йўналиш бўйича парвоз қилаётганида йўқолган», — деб ёзади Луис Арсе.

Йўқолган самолёт учувчиси 30 апрел куни фалокат сигналини берган ва шундан кейин алоқага чиқмаган. Бу вақтда ҳаво кемаси Тринидаддан 109 километр шимоли-шарқда бўлган.

Маълумотларга кўра, самолётни тажрибали капитан Пабло Андрес Веларде бошқарган. Учувчидан ташқари бортда уч нафар катта ёшли одам ва бир бола бўлган. Самолёт белгиланган вақтда қўнмагани ва экипаж билан алоқа йўқолганидан кейин ҳаво кемасини қидириш ишлари бошланган.

Самолётнинг йўқолиш сабаблари ҳозирча номаълум. Cessna Амазонканинг бориш қийин бўлган ҳудудларига фавқулодда қўнишни амалга оширган ҳам бўлиши мумкин. Ҳаво кемасини қидириш билан авиация кучлари ва қутқарув бригадалари шуғулланмоқда. Боливия ҳукумати, шунингдек, ҳарбийларни ҳам қидирув ишларига жалб этган.

Аввалроқ Таиландда енгил моторли Twin Otter самолёти ҳалокатга учраши оқибатида олти киши ҳалок бўлганди.

#Боливия #самолёт