Қозоғистон ҳукумати 9 май куни тантанали юришлар ўтказишни тақиқлади

Тақиқни четлаб ўтишга қаратилган ҳар қандай уриниш рухсат этилмаган митинг сифатида баҳоланади ва тегишли чоралар кўрилишига сабаб бўлади. Шунга қарамай, ташкилотчилар рухсат берилмаса ҳам акцияни ўтказишларини айтмоқда.

Қозоғистон шаҳарларида 9 май куни тантанали юришлар ўтказилишига рухсат берилмади, деб ёзмоқда «Настоящее время». Жумладан, Олмаота ҳокимлиги ҳам ушбу тадбирнинг ўтказилишига рози бўлмаган. Русийзабон аҳолининг катта қисми яшайдиган Павлодар ва Петропавловскда расмийлар тадбирни интернетга кўчириш ҳамда фронтдаги аскарларнинг суратларини махсус LED-экранларга жойлаштиришни таклиф қилган. Расмий сабаб — бўш майдонларнинг йўқлиги. Тақиқни четлаб ўтишга қаратилган ҳар қандай уриниш рухсат этилмаган митинг сифатида баҳоланади ва жарима ёки ҳибсга олинишга сабаб бўлади.

Бунинг фонида Олмаотада намойишлар ўтказмоқчи бўлган одамлар СССР байроғи билан мамлакат президенти Қосим-Жўмарт Тўқаевга мурожаат йўллади. «Биз ғолибларнинг авлодларимиз, 9 май куни Олмаота кўчалари бўйлаб Қозоғистонда «Қаҳрамонларга таъзим» деб аталадиган «Ўлмас полк» юришларини ўтказишни хоҳлаймиз… Президент ва жойлардаги барча маҳаллий ҳокимият органларига мурожаат қилиб, ушбу ватанпарварлик туйғуларимизни намоён этишга рухсат беришларини сўраймиз», — дейилади видеода. Улар ҳокимлик амалдорларини «антисоветлар» деб атаб, улар рухсат бермаса ҳам акция ўтказилишидан огоҳлантирмоқда.

Талдиқорғон, Қизилўрда, Туркистон, Ўрал, Атирау ва Костанайда Иккинчи жаҳон урушидаги ғалабанинг 80 йиллигига бағишланган юришларни ўтказиш режалаштирилмаяпти. Қозоғистон пойтахтида ҳам вазият шундай. Остона ҳокими Женис Касимбек кимдир «Ўлмас полк» ташкиллаштириш ниятида эканини биринчи марта эшитиб турганини айтиб, 7 май куни узоқ йиллик танаффусдан кейин шаҳарда авиашоу иштирокида ҳарбий парад ўтказилишини эслатди. Шу билан бирга Петропавловскда ўзларини «волонтёрлар» деб атаётган одамлар пайдо бўлган, улар қозоқларни Россия рубли эвазига намойишларда иштирок этишга ёлламоқда.

Қозоғистон шаҳарларида «Ўлмас полк» охирги марта 2019 йилда ўтказилган эди. Кейин коронавирус пандемияси сабаб икки йил ташкил этилмади. 2022 йилда Россия Украинага бостириб киргач, акция ўрнини миллий рамзларга эга «Қаҳрамонларга таъзим» номли тадбирлар эгаллади. Шунга қарамай, тантанали юришлар олдингисидан деярли фарқ қилмасди — уларда ҳам Иккинчи жаҳон уруши давридаги байроқлар ва ветеранларнинг портретлари кўтарилган ҳолда колонна ҳаракат қилади. 2023 ва 2024 йилларда ҳукумат «дунёдаги нотинч вазият», провокация эҳтимоллиги ва мамлакатдаги сув тошқинлари сабаб юришларни бекор қилганди.

#Қозоғистон #Ўлмас полк