ЦАҲАЛ Ғазодаги уруш стратегиясини радикал ўзгартирди

Бироқ сўнгги воқеалар ортидан қайтадан разведка маълумотларининг ишончлилиги, ҳудудни назорат қилиш даражаси ва ҲАМАС ҳаракатининг ҳатто кучли зарбалардан сўнг ҳам ўз фаолиятини тиклаш қобилияти ҳақидаги саволлар кун тартибига қайтди, деб хабар бермоқда Исроилнинг Walla нашри.

Айнан мана шу ҳудудларда ҲАМАС баъзи объектларини тиклашга, биноларни қўмондонлик марказларига айлантиришга ва ер ости инфратузилмасидан қайта фойдаланишга эришган. Бу эса операциялар тугаганидан сўнг етарли назорат ўрнатилмагани ва разведка хатолари борлигини кўрсатади. Туннелларни йўқ қилиш муаммоси ҳали ҳам долзарб: ҳатто кучли зарбалардан сўнг ҳам ер ости коммуникациялар тўлиқ вайрон қилинганига ишонч йўқ.

ЦАҲАЛ вакиллари аввалроқ «ҲАМАС метро тармоғи» деб аталувчи ер ости тизимини йўқ қилгани ҳақида маълум қилган эди, аммо амалиётда бу туннеллар фаолиятини давом эттирмоқда. Улардан кўп қисми фақат сўнгги кунларда аниқланиб йўқ қилинган. Бу эса уруш бошидаги расмий баёнотларнинг ишончлилигига шубҳа уйғотмоқда.

Ўт очишни тўхтатиш бўйича келишув бузилгандан сўнг манёврлар қайта бошланган.

Генерал-лейтенант Эял Замир бошчилигида амалга оширилаётган янги тактика рейдларга эмас, балки ҳудудни узоқ муддатли эгаллаб туришга асосланмоқда — бундай ёндашув ҳамасчиларга қайта куч тўплаш имконини бермайди. Асосий эътибор муҳандислик ишлари ва изчил назоратни ўрнатишга қаратилган. Бу эса катта ресурс, вақт ва қисмлар ўртасида юқори даражадаги мувофиқликни талаб қилади.

Стратегик ўқлар, хусусан Мораг ўқига алоҳида урғу берилмоқда. Бу ўқ Рафаҳни Хон Юнусдан ажратиб қўйди ва Ғазо сектори бўйлаб ҳаракатни чеклаб, ҳамасчиларнинг ҳаракатини мустаҳкам назоратга олиш имконини яратди.

Сўнгги маълумотларга кўра, Исроил қўшинлари Ғазо ҳудудининг тахминан 30 фоизини назорат қилмоқда. Якуний мақсад — секторнинг ярмидан кўпроқ қисмни эгаллаш. Бу ҲАМАС позицияларини заифлаштириш, уларнинг ҳарбий салоҳиятини чеклаш ва логистика йўлларини кесиш учун амалга оширилмоқда.