Зеленский Трамп билан суҳбат ҳақида: Фақат Запорижжя АЭС ҳақида гаплашдик

Украина президенти Володимир Зеленский Америка етакчиси Доналд Трамп билан суҳбатда фақат Запорижжя атом электр станцияси (ЗАЭС) атрофидаги вазият муҳокама қилинганини айтди. Зеленскийнинг 20 март, пайшанба куни айтган сўзларини украин ОАВ келтирди.

«Масала фақат вақтинчалик оккупация остида бўлган станцияга тегишли», — дея таъкидлади Украина давлати раҳбари. «Станция ишламаяпти, чунки Россия уни мутлақ ноқонуний ушлаб турибди», — дея қўшимча қилди у.

Украина раҳбарининг сўзларига кўра, «биз (Украина томони) бу станцияни қайта тиклашга қодирмизми», деган савол кўтарилган. Зеленский бу ерда тегишли инфратузилма, сув таъминоти ва техник ходимлар бўлиши кераклигини таъкидлади.

«Биз фақат битта станция ҳақида гаплашдик»

«Президент (Трамп) сўради: «Агар Америка буни қайта тиклай олади деган тушунча пайдо бўлсачи?» — деди Украина раҳбари.

«Мен унга шундай дедим: ҳа, агар модернизация қилиш мумкин бўлса... Биз сиз билан буни муҳокама қилишга тайёрмиз. Лекин биз фақат Россия томонидан вақтинчалик босиб олинган битта станция ҳақида гаплашдик», — дея хулоса қилди Украина давлати раҳбари.