ЕИ АҚШ товарларига жавоб божлари жорий этишни апрел ўрталарига қолдирди

Европа Иттифоқи расмийлари АҚШнинг ЕИдан келтирилаётган пўлат ва алюминий импортига жорий қилган 25 фоизлик божларига қарши чора кўришни апрел ўрталарига қадар кечиктирди, деб хабар беради Reuters.

Европа Иттифоқи 2018 ва 2020 йилларда келишилган чораларни қайта тиклашни режалаштирган эди. Божлар икки босқичда жорий этилиши кўзда тутилган: 1 апрелдан АҚШ экспортининг 4,5 миллиард еврога тенг қисми, 13 апрелдан эса яна 18 миллиард евролик товарлар қамраб олиниши керак эди. Биринчи босқичда, хусусан, Америка бурбонига 50 фоизли бож жорий этилиши режалаштирилганди.

«Биз ҳозирда Европа Иттифоқининг икки турдаги қарши чораларининг муддатларини мувофиқлаштириш имкониятини кўриб чиқмоқдамиз. Бу бизга ҳар иккала рўйхат бўйича аъзо давлатлар билан бир вақтнинг ўзида маслаҳатлашиш имконини беради, шунингдек, америкалик ҳамкорларимиз билан қўшимча музокаралар ўтказиш учун вақт яратади», — дейди савдо бўйича еврокомиссар Марош Шефчович.

Амалдорнинг сўзларига кўра, у АҚШ вакиллари билан саноат товарлари учун импорт божларини пасайтириш бўйича бироз прогрессга эришган.

Евроиттифоқ март ўрталарида Америка товарлари, жумладан, алкогол ичимликларига жавоб божларини эълон қилганди. Шунда АҚШ президенти Доналд Трамп апрел бошидан ЕИдан келадиган барча алкогол маҳсулотларига 200 фоизли бож жорий этиш билан таҳдид қилди.

Аввалроқ АҚШ ва Европа ўртасидаги савдо урушидан кўриладиган зарар қарийб 10 триллион долларга баҳоланган эди. Мутахассисларга кўра, Доналд Трамп бошлаган савдо уруши нафақат товарлар оқимига, балки инвестицияларга ҳам зарар етказиши мумкин.