Трамп: Украина АҚШ ёрдами билан ҳам омон қолмаслиги мумкин

Доналд Трамп Овал кабинетда Володимир Зеленский билан тортишиб қолганидан бери Украина президентининг Оқ уйга қайтиб келиши ва нодир металлар бўйича битим имзоланишини кутмоқда. Бу ҳақда Америка президенти Fox News’га берган интервюсида маълум қилди.

Трампнинг сўзларига кўра, у Украина президенти томонидан Вашингтон кўрсатган ёрдам учун миннатдорликни ҳис қилмаяпти. «У ақлли йигит. Ва у дангал йигит. У Байден маъмурияти даврида ёш боладан конфет олгандек, пул олди. Худди шундай муносабатда. Бу жуда осон эди! Уни миннатдор деб ўйламайман», — деди Трамп.

Fox News бошловчиси Трампга «агар ёрдам беришни тўхтатсангиз, Украинанинг омон қола олмаслиги сизни қониқтирадими?», дея савол берди. «Украина ҳар қандай ҳолатда ҳам омон қолмаслиги мумкин», — дея жавоб қайтарди АҚШ президенти.

Журналист айрим кузатувчилар Россия—Украина урушида АҚШ президенти Москвани қўллаб-қувватлаётганини айтганида, Трамп қуйидагича жавоб қайтарди: «Ҳеч ким Россия билан Доналд Трампчалик кескин муносабат олиб бормаган». Шунингдек, Америка етакчиси Владимир Путин билан «яхши келишишини» қўшимча қилди.

Нодир металлар тўғрисидаги битим 28 феврал куни имзоланиши керак эди, аммо Зеленскийнинг Вашингтонга ташрифи вақтида Трамп ва вице-президент Жей Ди Вэнс билан тортишув юз берди. Шундан кейин Украина президенти АҚШни муддатидан олдин тарк этди.

Бир неча кундан кейин Трамп Украина билан нодир металлар бўйича битим «ўлмагани», аммо Володимир Зеленский Америка Украинага берган барча нарсага «миннатдор» бўлиши кераклиги ҳақида гапирди.

NBC News манбаларига кўра, Трамп ўзининг ёрдамчилари билан суҳбатда Украинага ҳарбий ёрдам ва разведка маълумотлари беришни тиклаш учун энди нодир металлар бўйича битимни имзолашнинг ўзи кифоя қилмайди. АҚШ президенти Володимир Зеленский тинчлик музокараларида Россияга босиб олган ҳудудлардан воз кечиш ва президентлик лавозимидан кетишга қадар ён босишга тайёр туришини хоҳламоқда.