«Унинг ўрнида ҳар ким ҳам шу ишни қилган бўларди» — Трамп Украинани бомбардимон қилаётган Путин ҳақида

Владимир Путин АҚШ Киевга ҳарбий ёрдам кўрсатиш ва разведка маълумотларини алмашишни тўхтатганидан кейин ҳам «ҳар қандай одам қилгани каби» Украина инфратузилмасига ҳужумларини давом эттирмоқда. Бу ҳақда АҚШ президенти Доналд Трамп Овал кабинетдаги чиқиши давомида маълум қилди.

«Менимча, у ҳар қандай бошқа одам қилиши мумкин бўлган ишни қилмоқда. У буни тўхтатишни ва муаммони ҳал қилишни хоҳлайди, деб ўйлайман ва ҳисоблашимча, у аввалгидан ҳам қаттиқроқ зарбалар бермоқда. Ва менимча, унинг ўрнида бўлган ҳар қандай киши ҳозир айнан шундай йўл тутган бўларди», — дея Трамп журналистнинг саволига жавоб қайтарган.

АҚШ президенти Украинага қурол етказилишини тўхтатгани ва бу урушга якун ясашига ишончи комил эканини маълум қилди. «Мен улар битим тузишни хоҳлашаётганини билишим керак», — дейди президент. Унинг қўшимча қилишича, агар Киев урушни ҳал этишни истамаса, АҚШ Украинадан чиқиб кетади.

Трампнинг фикрича, Украинадан кўра Россия билан иш олиб бориш «осонроқ». У Владимир Путинга ишонишини қўшимча қилди. «Бизда Россия билан ҳаммаси яхши деб ўйлайман, аммо айни вақтда улар гўё лаънатланганлардек, Украинани бомбардимон қилмоқда. Украина билан эса тўғрисини айтсам, менга иш олиб бориш қийин ва уларнинг қўлида қарта йўқ», — деди Трамп.

Шу билан бирга, Трамп Москва Украинада жанговар ҳаракатларни тўхтатмаса ва Киев билан музокаралар олиб боришни истамаса, Россия «кенг кўламли» санкцияларга учрашини айтди. «Россия ҳозир жанг майдонида Украинани эзиб ташлаётганини инобатга олган ҳолда, мен Россияга нисбатан кенг қамровли банк санкциялари ва божхона тўловларини жорий этишни жиддий кўриб чиқяпман. Бу чоралар ўт очишни тўхтатиш ва якуний тинчлик келишувига эришилгунга қадар давом этади», — деб ёзади Трамп.

4 март куни АҚШ Украинага ҳарбий ёрдам кўрсатишни, кейинроқ эса разведка маълумотларини тақдим этишни тўхтатгани маълум бўлганди. Хусусан, Киев Россиядаги нишонларга узоқ масофадан туриб зарба беришда зарур бўлган маълумотларни олмай қўйган.

Шундан кейин Россия қўшинлари Украинанинг қатор энергетика тизимлари ва фуқаролик объектларига ҳужумлар уюштирди. Зеленскийнинг сўзларига кўра, 7 мартга ўтар кечаси Россия армияси 70 га яқин ракета ва қарийб 200 та дрон учирган.