Трамп вакиллари Зеленскийнинг сиёсий рақиблари билан яширинча учрашган

Эсингизда бўлса, АҚШ президенти Доналд Трамп Украина президенти Володимир Зеленскийга босим ўтказишга зўр берган вақтларда унинг рейтинги 4 фоизгача қулагани, Киев сайлов ўтказиши кераклигини айтганди. Трамп ва республикачилар оммавий чиқишларида бу мавзуга қайтмай кетишди. Бироқ Трампнинг одамлари Зеленскийнинг сиёсий рақиблари билан учрашиб, сайлов масаласини муҳокама қилгани маълум бўлди.

Порошенко ва Тимошенко билан

Аввалига Politico нашри Трампнинг одамлари Украинада президент Зеленскийга сиёсий рақобат қилиши мумкин бўлган икки сиёсатчи – Петро Порошенко ва Юлия Тимошенко билан алоқага чиққани ҳақида хабар тарқатди. Унда айтилишича, АҚШ президенти вакиллари Тимошенко ва Порошенко билан вақтинча сулҳ тузилган, лекин тинчлик музокараларидан олдин сайлов ўтказиш масаласини муҳокама қилишган.

Оддий сўз билан айтганда, Зеленский бўйсунмаётганидан жаҳли чиққан Трампнинг одамлари Порошенко ва Тимошенко билан кўришган. «Юлия хоним, жаноб Петро, агар Украинада сайлов бўлса, сизнинг унда ғалаба қозониш имкониятингиз қандай? Агар биз сизни қўллаб, сайловда ютишингизга ёрдам берсак, Зеленский каби қайсарлик қилмай, биз айтган ишларни қиласизми?» деган катта эҳтимол. Албатта, тўғридан тўғри бунақа дейишмайди. Лекин мен сизга гапнинг индаллосини тушунтириш учун шундай мисол қилдим.

Украинада сайлов ўтказилган тақдирда кимнинг имконияти яхши экани ҳақида видео тайёрлагандик. Унда Зеленский билан бирга Валерий Залужний ва Кирило Будановнинг имконияти яхши эканини айтганмиз. Бу икки номзод эса музокараларда Зеленскийдан юмшоқроқ позицияда бўлмаслиги аниқ. Шу сабаб Трамп маъмурияти жаҳл устида нисбатан гапга кирадиган номзод қидира бошлагани тахмин қилиш мумкин бўлган сценарий.

«Ҳозир сайлов ўтказадиган вақт эмас»

Бироқ Трамп вакилларининг режалари чиппакка чиққан кўринади. Чунки Politico яширинча ўтганини хабар берган учрашувлар ҳақида икки сиёсатчи ўз саҳифаларида ёзиб чиқишди. Порошенко америкаликлар билан Украина манфаати йўлида очиқ ишлаб келгани, бундай учрашувларни амалдаги ҳукумат билан келишиб ташкил қилиш тузуклигини айтган. Шунингдек, Порошенко Украина ҳукумати ва АҚШ ўртасидаги мулоқот йўқолишини катта хатар деб атаган. Украина собиқ президенти уруш вақтида мамлакатда сайлов ўтказиш хато эканини айтган.

Юлия Тимошенко ҳам америкаликлар билан учрашув ўтказганини тасдиқлаб, уруш вақтида Украинада сайлов ўтказиш ҳақида гап-сўз бўлиши мумкин эмаслигини айтган. Тимошенко чиндан Зеленскийнинг рақиби ҳисобланади. Лекин уруш бошлангач у украинларни президент Зеленский атрофида бирлашишга чақирганди.

Шу ўринда охирги сўровларга кўра, Порошенко ва Тимошенконинг рейтинги унча юқори эмаслигини таъкидлаш керак. Politico юқоридаги хабарни эълон қиларкан, Украинада Зеленскийнинг рейтинги ҳамон энг юқори – 44 фоиз эканини қайд этган. Энг яқин таъқибчи Валерий Залужнийнинг рейтинги 21 фоиз, Порошенко ва Тимошенконинг рейтинги мос равишда 10 ва 5,7 фоиз экани қайд этилган.

Ўткир Жалолхонов тайёрлади.

Тасвирчи ва монтаж устаси – Фахриддин Ҳотамов.