Франция собиқ президентига электрон браслет тақилди

Николя Саркозига суд қарори билан фақат эрталаб соат 8:00 дан 20:00 гача уйидан чиқишига рухсат берилди.

Фото: AFP

Франциянинг собиқ президенти Николя Саркозига телефон суҳбатларини махфий эшитиш иши бўйича судланганидан кейин электрон браслет тақилди. Le Monde ёзганидек, бу собиқ давлат раҳбари учун мисли кўрилмаган чора.

Саркози энди фақат соат 8:00 дан 20:00 гача, душанба, чоршанба ва пайшанба кунлари эса соат 21:30 гача уйдан чиқиши мумкин. Шу кунлари у Ливия томонидан ўз президентлик кампаниясини молиялаштириш бўйича очилган иш юзасидан судда қатнашиши лозим.

Қайд этилишича, Николя Саркозининг 2024 йилнинг 18 декабрида «махфий эшитиш» деб аталган иш бўйича Франция Олий судига берган апелляцияси рад этилиб, унга нисбатан 1 йиллик қамоқ жазоси ва уни электрон мониторинг билан алмаштириш ҳақидаги ҳукм ўзгаришсиз қолдирилди.

Саркози «ҳукмнинг моҳиятига эътироз билдиришда давом этмоқда», деди унинг адвокати Жаклин Лаффон ва «ой охиригача» ишни Инсон ҳуқуқлари бўйича Европа судигача олиб боришини қўшимча қилди. Бироқ, бу ҳукмнинг ижросига тўсқинлик қилмайди.

Собиқ давлат раҳбари айни дамда 2007 йилги сайлов кампаниясини Ливия томонидан ноқонуний молиялаштирилганликда гумон қилиниб, 10 апрелгача давом этадиган суд жараёнида қатнашмоқда.

Таъкидланишича, Саркози 70 ёшдан ошган шахслар учун қонунда назарда тутилган муайян шартларни бажарса, браслетни олиб ташлаш учун ариза бериши мумкин.

#Франция #Николя Саркози #электрон браслет